DARO: Projek ngaga Jalai Passin-Matu diatu ditampung sereta disadang tembu ba bulan Disember 2026.
Kaban Kunsil Nengeri (ADUN) Daro, Safiee Ahmad madah, projek nya sebedau tu tejanggal lalu diatu lanchar nitih langgur.
“Jalai 19.3 kilometer (km) pemanjai ti beungkus RM77.88 juta nya udah manggai 22.45 peratus tembu.
“Naka diatu, pengawa meresi taba enggau ngisi pasir benung chakah dipejalai ba Kilometer 13 tunga ari Jemoreng.
“Tu siti renggat ti pemadu beguna sebedau pengawa ngaga struktur jalai ditampung,” ku iya rambau dirandau pemberita.
Ngelansa silik, Safiee nyemetak madah, sida deka matau terit projek nya ngambi pejalai projek lanchar nitih langgur.
Terang iya, ketegal pemuntan ba renggat tumu, nya ngujungka kos projek nya nambah ari ungkus asal RM65 juta ngagai RM98 juta ungkup nembu projek nya.
“Terima kasih ngagai Premier Sarawak, Datuk Patinggi Tan Sri Abang Johari Tun Openg laban seruran meri perati dikena nentu menua pesisir enda tinggal ba pemansang.
“Iya (Premier Sarawak) udah ngemendar agih belanja tambah dikena nentu projek tejanggal tu ulih ditampung kenyau ari taun nyin kemari nengah kunteriktor ti baru,” terang iya.
