KANOWIT: Projek Jematan Nanga Machan semak Pasar Machan ditu nyau deka tembu, ku penerang ari Kaunsil Pemansang Koridor Wilayah (Recoda), ensanus.
Penerang nya madahka projek nya diatu udah tembu tiga suku lebuh jalai nya nyau deka tembu.
“Pengawa nirika tiang dikena ngaga jematan semin sepanjai 130 meter meraka Sungai Kanowit tu deka nyendiaka jalai penyambung ke meruan agi ungkup komuniti Iban di 45km ba selatan pasar Sibu.
“Pengawa ngaga sapat benung dipejalai ngambi tiang jematan nya tegap agi.
“Entali ai mega udah digaga dikena nagang penusah bah ba kandang menua nya,” terang iya.
Ku iya, sida mega bejalaika projek ngemanah Jalai Ulu Machan ke alai jalai tanah sepanjai 9.5km deka dikemanah ngagai jalai standard R1.
Iya madah, nitihka skop projek, jalai ti dikemanah nya deka nyendiaka jalai alun ke likun agi ungkup peranak menua pesisir lebuh betengahka jalai nya sereta nyungkak ekonomi ke nyendiaka jalai ungkup komuniti sungai terus ngagai jalai besai.
Terang iya, projek infrastruktur nya dipejalai Ejensi Pemansang Ulu Rajang (URDA) di baruh Recoda.
Jematan Nanga Machan ti beungkus RM30 juta meraka Sungai Kanowit nya udah berengkah dipejalai bulan April 2019.
Projek tu dikemendar di baruh program pemansang URDA ari Perintah Sarawak lalu disadang tembu ba timpuh dua taun.
Penembu projek jematan tu deka nyadi penyikap enggau meri pemaik ngagai peranak dia sereta ngeranchakka agi pemansang ekonomi peranak di Nanga Machan.
