Projek Pan Borneo Sarawak tembu Jun 2022

KUCHING: Projek Jalai Besai Pan Borneo (LPB) Sarawak disadang deka tembu ba bulan Jun 2022, iya nya setaun laun ari timpuh ke udah ditetapka dulu ari nya.

Menteri Kereja Raya (KKR) Baru Bian madahka timpuh baru penembu projek LPB nya ditentuka sida pengudah berandau enggau sebelas Kunteriktor Pakej Kereja (WPC) ti deka neruska pejalai projek nya ngena chara konvensional.

“Lebuh pejalai renggat keterubah projek tu siba, LPB disadang deka tembu kenaka 30 Jun 2021.

“Taja pi, pengudah kunterik kompeni Jalai Besai Borneo Utara Sdn Bhd (LBU) diketuka nyadi Project Delivery Partner (PDP), kami ba opis menteri nagit projek tu ulih tembu kena Jun 2022,” ku iya.

Baru madah munyi nya ba aum pemberita pengudah nyuaka surat nyiri Opis Kereja Raya (JKR) Sarawak nyadi Pemesai Penerit (SO) sereta mantaika tuju LPB Sarawak ba Opis JKR Sarawak di Wisma Saberkas ditu, pagi tadi.

Nangkan nya ku iya, naka Januari 2020 tu tadi, pemansang pejalai projek nitihka jadual kunterik PDP iya nya 44.21 peratus dibandingka enggau 47.82 peratus.

“Taja pia, nitihka pansik ari JKR Sarawak enggau Independent Consulting Engineer (ICE) ti ngena program kereja PDP, pemansang projek nya nitihka Januari 2020 iya nya 45.81 peratus dibandingka enggau 61.23 peratus lalu disadang tembu ba Disember 2021.

“Tang pengudah piak JKR Sarawak berandau enggau 11 WPC apin lama ti udah, semua WPC tu madahka projek sida disadang ulih tembu pemadu laun ba bulan Ogos 2022,” ku iya.

Nya alai ku Baru, enti dibandingka enggai timpuh ke udah ditetapka lebuh PDP megai kunterik tu suba ti patut tembu kena 30 Jun 2021, timpuh nembuka projek tu udah jauh tinggal ari ke patut.

“Aku ngarapka semua MPC ke ulih nembuka projek nitihka timpuh ke udah ditetapka.

“Projek ke dulu abis ari timpuh ditetapka nya pekara ti manah, lalu ngagai sida ke udah laun patut ngerumban projek dipegai kita,” ku iya madah nyemetak.

Kelimpah ari nya, Baru madahka KKR diatu ti nyadi piak ke ngempu projek nya begulai enggau JKR Sarawak deka bekerejasama enggau manah ngambika projek nya ulih tembu ba bulan Jun 2022.

Suara Sarawak