Projek pasar besai Matu, nyendia peluang ekonomi baru

MATU: Projek ngaga pasar besai Matu ukai semina ngubah pelilih tu tang mega deka nyendiaka peluang ekonomi baru ngagai rayat mayuh ke besemak.

Kepala Menteri Datuk Patinggi Abang Johari Tun Openg madah, pengawa numbuhka pasar besai nya sebagi ari pengeransing perintah Sarawak deka meda pelilih menua tu enda dikemelu ari pemansang.

Kelimpah berubah gamal ngagai moden, ku iya perengka guna nya jemah bepenau negapka ekonomi Matu ba industri mansau.

“Pemansang timpuh panjai pelilih tu begunaka agih besai. Nya alai, kitai nguna pelin besai ke lebih manah ke pemaik semua raya.

“Nya alai, kitai tetap ingatka pemansang pemun baka jalai raya enggau jematan kelimpah meri fokus ngagai perengka guna digital ungkup guna peranak ke besemak,” ku iya.

TEPA…Abang Johari nerima tepa ari Pemancha Johari Rimong seraya dikemataka Juanda (kiba), Ahmad Johnie sereta temuai bukai.

Iya madah munyi nya rambau ngulu Pengerami Nangguhka Pengerami Matu 2019 Ke-28, Bejadi Pengerami Gawai Raya Pelilih Matu, Pengerami Nasih Tanah Projek Pasar Besai Matu enggau Pengerami Bejadi Masjid Daerah Matu, ditu kemari.

Ba pengerami nya iya bisi ngemendarka agih belanjaRM2juta dikena ngemujurka pengawa meresi sungai Matu enggau pengawa ngurangka penyadi penusah ampuh bah ke suah untung sida semenua lebih agi maya musim landas.

Pemeri nya ku iya, diberi ungkup nyaga pengelantang enggau pengelikun rayat.

Berebak enggau nya, mayuh agi program pemansang deka dipejalai ungkup rayat ba pelilih tu. Kitai deka bebendar agi nentuka pelilih tu mansang dalam genap sukut.

“Nya alai, aku nesau peranak Matu terus begempung meri kerejasama ngambika semua perambu pemansang dipejalai enggau mujur,” ku iya.

Pengawa ngemujurka projek pasar besai Matu nya dikemansang nengah agih belanja RM16.5 juta lalu dipelaba bepun Oktober taun tu.

Sama datai Kaban Parlimen Igan, Ahmad Johnie Zawawi, Kaban Kunsil Nengeri (Adun) Jemoreng Datuk Dr. Juanda Jaya, Adun Daro, Safiee Ahmad enggau Residen Mukah, Hamdiah Bakir.