Projek Pensel: Pelajar ungkup serap umur

Kelas Orang Tuai nyadi pun ubah runding angkun ngiri penemu

BALAI RINGIN: Betatika pemesai guna pelajar ukai semina ungkup sida ke nembiak aja, Tim Projek Pensel nampung singkang napatka sida ke lunggar umur.

Kelas dipejalaika Projek Pensel sekali tu ngaul sida ke tuai, ku Pemungkal Projek, Norina Umoi Utot.

“Tuju ke satu kelas tu diatur ngambika sida ke tuai bela ampit ngasaika diri besekula, laban pengawa ngiri penemu tu nadai ditatak umur, semua kitai bisi hak belajarka penemu.

“Abis nadai sida tu ila ngelala lumur enggau urup, ulih nulis nama diri,” ku Norina madah nyemetak lebuh dirandau Suara Sarawak sentang tusun pejalai enggau tuju kelas ungkup orang tuai nya.

NYINUK… Sida ke tuai gagit belajar nulis lebuh ngulu kelas ti diatur ba Kampung Sepan di Balai Ringin.

Ku Norina, kelas tu sebagi ari aktiviti Projek Pensel pemadu baru ti diatur ba dua buah genturung pendiau iya nya di Kampung Sepan ti diembing endu Jessica Liam enggau di Kampung Melikin Sungai Gudom (endu Korea) ditu.

“Lebuh pejalai ngabas kelas tu, aku limpang nanya siku ari ini tua beumur dalam 80 taun, nama kebuah iya bisi ati ngulu kelas tu.

“Sinu amat ninga saut tudah tuai ti madahka diri udah tu enti sema iya kediri aja ke sepital, abis nadai iya ngelala lumur, enda ibuh betanya ngagai orang bukai agi,” ku Norina siru.

Kelimpah ari nya, mayuh timbal bukai ti manah diambi nyadika lalau enggau langkar pejalai Projek Pensel jemah nentuka juluk enggau tuju sida setipak enggau peminta jeman.

BAKA TU CHARA… Sida ke tuai diajar chara nulis urup enggau lumur rambau atur Kelas Orang Tuai di Kampung Melikin Sungai Gudom.

Kelas tu diatur tiga kali seminggu seraya sida ti ngajar endang volunteer besaup enggau Tim Projek Pensel ngemansangka pelajar ari renggat tumu di menua tu.

Norina andal amat pengujung kelas ila deka nyapai tuju kelas nya lalu sida ke belajar deka dirami ba sebengkah Pengerami Graduet Sekula Tuai ti deka dipenyadika iya empu.

Taja diatu apin bisi kelas ti meruan, nadai disikap ngena bangku enggau mija baka kelas bukai ketegal penekul ba pekara belanja, tang Norina andal ulih minta agih belanja ari raban ejensi enggau opis bekaul sentang pekara nya.

“Pekara tu beguna amat ungkup pengelantang enggau pulaika pemaik sida ti ngajar enggau belajar.

“Tu aja chara dikena aku nulung enggau malas jasa sida ke tuai, ti udah kiruh ngemansangka ruang bilik diri kenyau ari mit, tinggal sekula ukai dikedeka sida empu tang ketegal penekul bukai,” simpul Norina.