Projek RM10 juta Waterfront Batu Kawa ditampung

KUCHING: Projek Rayat ngaul Tebing Sungai Pasar Batu Kawa tauka dikumbai Waterfront Batu Kawa deka ngerumban pemansang enggau nyungkak ekonomi dagang temuai menua tu.

Kepala Menteri Datuk Patinggi Abang Johari Tun Openg madah temuai ulih merau ari Waterfront Kuching nuju Waterfront Batu Kawa tau ngenduh dia sebedau merau napatka Waterfront Siniawan pengudah projek tembu jemah.

“Taja projek sebedau tu ngaul kerejasama entara Perintah Besai (Barisan Nasional) enggau Perintah Nengeri tang pengudah Perintah Besai bekalih ngagai Pakatan Harapan, projek tu lalu tejanggal.

“Berundingka pengelantang rayat ke alai projek tu ditampung lalu ungkus iya dipelanja penuh Perintah Sarawak empu laban keran ngemansangka menua ti ngembuan pesaka asal raban bansa China di Batu Kawa kelimpah ngayanka penyerakup pupu bansa,” ku iya madah nyemetak.

Abang Johari mansutka jaku nya lebuh bejadika Pengawa Ngelanchar Projek Rayat Tebing Sungai Pasar Batu Kawa ba Dewan Gerempung Chung Hua Batu Kawa ditu tadi.

NYAPAI SEMPEKAT… Abang Johari Tun Openg (empat kanan), Prof Dr Sim Hui Kian (enam kanan) bejadika Pengerami Ngelanchar Projek Rayat Tebing Sungai Pasar Batu Kawa ditu tadi. Sama bisi dipeda Ir Lo Khere Chiang (tiga kanan).

Kelimpah ari nya ku iya, perintah di baruh pegai GPS endang keranka pemansang ungkup rayat.

“Perintah GPS endang nadai kala ngelaungka pemansang rayat, enti sema Perintah Besai diatu madah suntuk belanja, kitai empu deka mansutka belanja dikena nyendiaka perengka guna sida.

“Ukai deka madah menua kitai tu mayuh duit sereta sepeneka masau belanja, tang asil ari pemansang patut dikunsi enggau rayat,” ku iya nampung.

Projek beungkus RM10 juta asil kerejasama Perintah Besai (BN) enggau Perintah Sarawak sebedau tu ke alai ungkus projek dibayar bela, tang BN alah bepilih besai ngujungka projek nya dibayar penuh perintah menua tu.

Seraya Menteri Kaunsil Kandang Menua Datuk Prof Dr. Sim Hui Kian ti mega Adun Batu Kawa madahka diri berasai lantang pengudah Kepala Menteri nyanggup nampung pejalai projek nya.

“Aku berasai gaga laban Kepala Menteri sanggup ngeluarka agih belanja dikena nampung projek tu.

“Projek deka nyadi kelai peranak Batu Kawa sereta deka ngerumban pemansang kelebih agi ngaul industri dagang temuai enggau dagang pemakai,” ku iya.

Ku Sim, diatu projek benung digaga ba renggat keterubah sereta ngarapka maya datai ba renggat kedua, Perintah Besai Pakatan Harapan ulih nyaup belanja projek tu dataika tembu.

Sama datai Chairman Majlis Pembandaran Padawan ti mega Adun Batu Kitang Ir Lo Khere Chiang, bala Temenggong, ketuai raban bansa, piak opis menteri sereta bala bukai.

Suara Sarawak