Projek RTP meri pemaik ngagai kunteriktor Bumiputera

PUSA: Projek ti dipejalai di baruh Program Transfomasyen Menua Pesisir (RTP) tu kebendar meri pemaik ngagai bala kunteriktor Bumiputera kelimpah ngubah gaya pemansang menua pesisir.

Adun Saribas Mohammad Razi Sitam madahka tu nyengkaum ti baru bisi serikat Kelas F.

“Nya alai, projek RTP tu meri pemaik ngagai kunteriktor mit laban dipejalai nengah chara chabut undi ba renggat bagi menua di selampur Sarawak.

“Chara tu kebendar mayuh ngangkatka kunteriktor bumiputera nyengkaum serikat Kelas F ti baru deka gawa enggau perintah,” terang iya.

Razi ti mega Kaban Supreme Kaunsil PBB mansutka jaku nya lebuh ngabas perambu taba ngaga padang futsal baru di Kampung Tuie, ditu kemari.

Taja pia, iya ngarapka semua kunteriktor bejalaika semua projek enggau manah.

“Aku mega ngarapka sida enda beambi ulih lebuh bejalaika projek laban rayat dekaka buah pemansang.

“Semua kitai mesti bejalaika tanggung pengawa enggau manah ngambi agih belanja perintah enda tebasau ngapa sereta dikena nangkup peminta rayat ti randaka pemansang.

Nambahka nya, Razi madahka jaku bala penyakal udah mantaika jaku petenah bekaul madah pengari rayat udah salah guna agih belanja RTP.

“Kebendar, penyakal enda ulih nerima pemanah projek RTP di Sarawak kenyau ari taun 2015 taja sida mega udah ngasaika pemanah ari projek tu.

“Nya kebuah, sida enda ulih pemanah iya ngujungka bemacham isu bekaul RTP sereta isu tu dibalut enggau pekara politik.

“Ba penemu aku, sida mesti tuai runding enggau anang nambahka berita laban nya ungkup pemansang Sarawak kelebih agi ba menua pesisir,” terang Razi.