LAWAS: Projek ngagai Arung Jalai Sarawak-Sabah (SSLR) ke beungkus RM1.15 bilion dipelaba tembu dalam timpuh 55 bulan (taun 2026), ku Datuk Seri Fadillah Yusof.
Kenu ku Menteri Kereja Raya nya projek ngaga jalai ke besambungka dua nengeri tu deka berengkah ari Lawas ke Simpang Long Lopeng pemanjai 77 KM.
“Aku taja pia udah nyerahka Surat Setuju Terima (SST) ngagai raban kunteriktor ke mujur kena September tu tadi.
“Arapka semya perambu tu lebih agi raban kunteriktor bebendar gawa awakka projek tu ulih tembu nitihka timpuh enggau jam ke udah ditaga nitihka standard enggau bajet ke udah ditetapka” ku iya rambau Pengerami Nasih Tanah Projek SSLR di Batu 2, Simpang Gelugus, kemari.
Tandu Fadillah, perambu nya mega seriris enggau Langgur Pemansang Malaysia Lumpar Ke-12 (RMK-12).
“Nyema kitai agi ingat, maya mantaika jurai RMK12, sebengkah ari batang pengawa deka diadu iya nya ngedut takah pemansang entara nengeri Sarawak enggau Sabah kelimpah ari Kelantan, Perlis enggau Kedah.
“Tu endang nengeri dikemerat dikena nentuka takah pemansang infrastruktur ulih dikedut. Tu mega batang tuju kami ba KKR enggau ‘InshaAllah’ deka terus digaga,” ku iya.
Ku iya, tu mega mandangka kaul kerejasama entara perintah besai enggau perintah Sarawak dibaruh iring GPS chukup tegap.
“Enti kitai berati baru, suba sebagi projek kitai maya dibaruh pegai Perintah Pakatan Harapan,mayuh projek dikinsil.
“’Alhamdulillah’ lebuh perintah diatu mega, kitai nguji ngaduka baru pemansang infrastruktur di nengeri Sarawak tu nengah kaul ke manah entara perintah nengeri enggau perintah besai,” ku iya.
Berebak enggau nya, Fadillah mega madah taja kiruh mutarka penanggul ketegal pandemik Covid-19, KKR mega seruran bebendar nentuka semua perambu digaga terus dipejalai.
“Tu dipandangka nengah pengawa nasih tanah sehari tu (ensana) enggau ‘InshaAllah’ agi bisi deka digaga udah tu.
“Ukia semina ba Semenanjung, tang mega ba Sabah enggau Sarawak baka ngaga pan borneo. InshaAllah sekeda pakej deka disedia enda lama agi, kitai deka nganggauka Kepala Menteri kitai Datuk Patinggi Abang Johari Tun Openg bejadika nya,” ku iya.
Nangkan ke nya, Sapit Kepala Menteri Datuk Amar Awang Tengah Ali Hasan madah juluk rayat deka bisi jalai raya deka nyadi nyata.
“Nyema jalai tu udah digaga ila, nya deka ngemuntangka kitai bejalaika bekal karang ba menua pesisir terus ke Ba Kelalan, pia mega enggau bekal ai.
“Nya alai, kitai ulih nyambung sekeda sitak enggau sistem regulasi ungkup bekal ai,” ku iya.
Tandu Awang Tengah ke mega Adun Lawas, projek SSLR tu ukai semina ngemuntangka ari sukut penyambung, tang mega mantu ngelengkas pemansang sosioekonomi rayat.
Kenu ku iya, nengah iring Abang Johari, kitai ba Sarawak datai ba pelasar ke betul enggau sukung penuh patut diberi ngagai iya.
“Arapka kitai terus bekerejasama lalu rayat terus beserakup meri sukung penuh ngagai iya. Awakka GPS terus mai pemansang, ubah enggau ngangkatka pengidup rayat,” ku iya.
Berebak enggau nya, Awang Tengah minta perintah besai nyendiaka agih dikena ngaga jalai ‘missing link’ sepanjai 170 km ba utara Sarawak dikena ngenapka arung SSLR enggau perambu ngaga Northern Coastal Highway ke rembus terus ke Sabah.
Ku iya, ‘missing link’ nya semina 170 km aja lalu aku ngarapka Datuk Seri Fadillah ulih ngiga agih belanja nya.
