Projek Taman Burung ditampung baru

KUCHING: Pengawa numbuhka Taman Burung di Taman Dewan Bandaraya Kuching Utara (BKU) deka ditampung baru pengudah tejanggal.

Menteri Dagang Temuai, Seni, Main Asal, Nembiak enggau Lumba Datuk Abdul Karim Rahman Hamzah netapka opis menteri iya diatu berunding deka ngemujurka projek nya.

“Kitai patut udah numbuhka taman burung di Taman DBKU ditu, tang projek tu tejanggal.

“Ketegal nya, opis menteri aku berunding deka ngemujur projek tu alai pekara tu mega udah dipadah ngagai ketua menteri,”ku iya.

Abdul Karim mansutka jaku nya ngagai pemberita pengudah ngelawa palan endur ngaga Filem Sumpahan Jerunei di Taman DBKU ditu, tadi.

BEJADI…Datuk Abdul Karim Rahman Hamzah (kanan) begulai enggau bala bukai ngemujur filem ‘Sumpahan Jerunei’ tadi.

Ku iya nambah, taman ke ba baruh bukit (Begunan DBKU) nya chukup manah sereta engkeman ungkup pengawa rekreasyen.

Kelimpah numbuhka taman burung, iya mega dekaka perengkaguna ba taman nya ditambah tauka diangkatmanah.

Ngenang sentang Filem White Rajah ke benung digaga diatu, Abdul Karim madah filem nyadi sebengkah inisiatif Opis Menteri Dagang Temuai ti keran deka ngangkatka pesaka asal Negeri Sarawak.

Ku iya, opis menteri mega keran deka ngangkatka Sarawak nyadi palan pematak temuai ke tebilang nengah filem.

Filem mandangka palan pemerindang, rampa menua ke manah ke tau matak bala temuai datai ke Sarawak, tandu Abdul Karim.