PSB dipilih awak rayat enda pechah

KUCHING: Kitai enggai rayat Sarawak pechah nya kebuah pemutus dijapai milih PSB ari ti numbuhka parti baru, ku Baru Bian.

Ex-Chairman PKR Sarawak nya madah sigi agi kebuah milih PSB laban juluk besai nitihka udah dibantai sebedau tu chukup sebaka enggau juluk PSB.

“Kitai deka Sarawak nyadi model menua bukai iya nya semua ngasaika diri sebaka enda ngira bansa enggau jalai pengarap. Kelimpah nya kitai deka nentuka pengeraja asal di menua tu diintu enggau manah ke pemaik semua rayat.

“Kami mega deka meda nyadi perintah ti beresi ari sukut atur pengawa enggau enda belembut bekaul pekara makai suap ba sebarang tikas.

“Nya alai, aku nesau semua rayat ti sama pengarap sereta juluk ungkup Sarawak Baru datai mih ngagai PSB lalu meri sukung penuh ba pengawa bepilih besai ti deka datai,” ku iya.

Baru madah munyi nya ba aum pemberita ke diatur ba Indu Opis PSB di Jalai Pending, ditu pagi tadi.

Nangkan nya, Baru madah nengah peneleba Presiden PSB, Dato Sri Wong Soon Koh pengelama 15 taun ba pengawa nyadi menteri sereta sekeda penuduk bukai kenyau 25 taun ke udah nyengkaum nyadi Speaker Dun dikeandal tau ngiring nengeri tu nuju jalai ti betul.

Diatu ekonomi dunya balat kusut nyengkaum Jipun sereta beberapa menua ke bukai. Nya alai, kitai andal Soon Koh tentu pintar ngatur belanja enggau manah ke pemaik nengeri tu jemah, ku iya.

Suara Sarawak