KUCHING: Pengawa mulai ke baru peresa nyengkaum Pentaksiran Tingkatan Tiga (PT3) enggau Ujian Pencapaian Sekolah Rendah (UPSR) ba sistem pelajar menua siti inisiatif ti udah lama dianti majoriti bala pengajar laban dipechaya meri empas positif ngagai pemansang nembiak.
Presiden Gerempung Pengajar Sarawak (STU), Kullin Djayang madah, Opis Menteri Pelajar Malaysia (KPM) patut berati ke sadang penemu enggau buah runding semua pengajar ti nyadi raban bejalaika polisi pelajar menua.
Iya madah, semua gerempung pengajar enggau staf pelajar udah nyikap diri berandau ungkup ngelanggur pelasar ti nemban enggau meruan agi.
“Dikena negapka agi pekara tu, STU bisi bejalaika pansik ngagai kaban gerempung tu ba bulan Oktober 2024.
“Ari sepenyampau 2,060 responden, 1,643 pengajar tauka 79.8 peratus setuju peresa tu dipulai ke baru lalu semina 20.2 peratus aja ti enda setuju.
“Pemutus tu nyengala mandangka pengawa mulai ke baru peresa tu siti pekara ti releven,” ku iya lebuh dirandau pemberita ditu, kemari.
Tampung iya, bepelasarka timbal ti diterima, pemutus peresa nyadi indikator ti beguna dikena ngemuntang raban sekula nentu kelas enggau bidang ti engkeman ungkup nembiak.
Kelebih agi, ku iya, lebuh ngaul nembiak ti ngalih ari Primari Enam ke Pom Satu enggau ari Pom Tiga ke Pom Empat.
“Pia mega, penusut runding ketegal peresa deka nempa nembiak majak bedisiplin sereta meri perati agi ngagai pengawa ngajar enggau belajar.
“Nembiak mega deka meri komitmen ti tinggi agi ngagai pelajar lebuh bisi peresa lalu pemutus ti diulih sida ulih ngemau pengeransing sida belajar ngagai renggat ti tinggi agi,” ku iya.
Kullin nyemetak madah, semua raban enda patut semina meda sukut negatif ti kala nyadi sebedau tu nyengkaum manding pemutus entara sekula tauka nembiak ti ulih meri penusut runding ngagai raban sekula.
“Kebendar, kitai patut meresa empas pekara tu ngagai kualiti nembiak ti udah tembu sekula.
“Raban KPM, Opis Pelajar Nengeri (JPN), Opis Pelajar Pelilih (PPD) enggau raban sekula patut bejalaika inisiatif ti nemban dikena mutar kes mit baka tu.
“Perintah ngembuan mayuh pakar psikologi lalu KPM empu bela dibantu kaban kaunsil penyanding penemu ti bepenau ba pekara tu,” terang iya.
Tampung iya baru, STU bela ngaku pemesai guna sistem ti endang bisi sereta ulih nentu tikas pengulih nembiak chara meruan.
Taja pia, ku iya, sistem peresa mega nentu pengulih nembiak enggau meruan nyema chara ngatur sereta tikas meresa diseriris nitih guna, pemintar enggau pengerindu nembiak.
“Pengawa nentu tikas nembiak tu patut ditungkap enggau silik laban tetiap nembiak ngembuan pengerindu enggau pengelebih ti bebida.
“STU setuju enggau inisiatif mulai ke baru sistem peresa tang pengajar patut diberi awak ti mayuh agi begulai enggau nembiak ungkup pengawa ngajar enggau belajar.
“Lalu ukai ditating enggau bemacham pangku pengawa sereta aktiviti bukai ti kurang meri empas ngagai pelajar.
“Penyampau pekit, kem tauka worksyop ti enda tentu bekaul enggau pelajar patut dikurang.
“Pia mega, pangku pengawa kerani enggau ngerikod data nengah tali arus mega patut dikurang,” ku iya nyemetak.
