KUCHING: Tuju Rang Undang-Undang (RUU) Librari Negeri Sarawak (Ubah) 2026 ngenegap sereta ngemodenka pengawa ngatur, pejalai enggau pengawa pengatur Pustaka Nengeri Sarawak ngambi seriris enggau pemansang kemaya hari sereta guna institusyen nya.
Menteri Pelajar, Inovasyen enggau Pemansang Penau, Datuk Sri Roland Sagah Wee Inn madahka tuju ubah nya deka ngemaruka ‘Ordinan Perpustakaan Negeri Sarawak 1999’ (Bab 29).
Ku iya, nya dikena nentuka langkar undang-undang institusyen nya mengkang relevan bejalaika tanggungpengawa ti majak nambah.
“Kenyau ari ordinan nya berengkah dikena dalam taun 1999, Pustaka Nengeri Sarawak majak ngerembai sereta ngasaika transformasyen, ke alai kepenudi ubah RUU nya digaga ba bulan Disember 2019.
“Pemansang organisasyen, tanggungpengawa enggau guna operasyen librari kenyau ari nya ngasuh pengawa nisih baru langkar undang-undang patut digaga nitihka timpuh, setipak enggau pemansang Sarawak ti jampat,” ku iya.
Sagah bejaku munyi nya rambau mantaikka RUU Librari Nengeri Sarawak (Ubah) 2026 ba Aum Kedua Penggal Kelima Kunsil Nengeri (DUN) Sarawak ba Kompleks DUN, ditu tadi.
Ku iya, sekeda batang pekara ba ubah RUU nya baka ngaku sereta nerangka pangku pengawa enggau kuasa menteri ti megai tanggungpengawa ba Pustaka Nengeri Sarawak, nyengkaum kuasa meri atur ngagai kaunsil bekaul pengawa bejalaika kuasa, pengatur enggau tanggungpengawa iya.
