Putar jampat penanggul suntuk pengajar di Bintulu

KUCHING: Bintulu agi napi penanggul suntuk pengajar sekula primari enggau sekondari.

Menteri Muda Pelajar enggau Pansik Teknologi, Dr Annuar Rapaee madah, Opis Pelajar Nengeri Sarawak (JPNS) keran mutarka penanggul tu nengah sekeda chara dikearap ngasi dipejalai.

“Tu nyengkaum nganjung pengajar ke baru ngajar sekula ti suntuk pengajar sereta mindahka pengajar ke bisi ngagai sekula bukai dikena meri awak pengajar baru ngisi pangku pengawa nya.

“Kitai mega benung minta pemendar ari Opis Menteri Pelajar Malaysia (KPM) ngambi pengajar Interim ngajar di sekula tu,” ku iya.

Dr Annuar nyaut tanya Adun Tanjong Batu Chiew Chiu Sing pasal berapa penyampau tubuh pengajar agi diguna dikena nangkup peminta di sekula primari enggau sekondari di Bintulu sereta chara mutar enggau ni naka penyampat sida ulih mutarka penanggul tu.

Seraya Chiew Chiu Sing madahka diri berasai asa sereta lebu laban JPNS enda bebendar gawa mutarka penanggul suntuk pengajar di Bintulu.

“JPNS patut beratka pekara pengelantang sekula enggau penanggul suntuk pengajar di menua tu.

“Kitai di Sarawak bisi Opis Pelajar kediri empu, nadai kebuah kitai enda ulih mutarka penanggul suntuk pengajar di sekula primari enggau sekondari,” ku iya madah nyemetak.

Ku Chiu Sing, di Bintulu aja napi penanggul suntuk 61 iku pengajar sekula primari seraya 60 iku di sekula sekondari enda nyengkaum menua bukai.

CHIEW CHIU SING