MIRI: Hari Indu Sedunya mai reti chukup besai ngagai bala indu berubat ba Wad Beranak Sepital Miri ditu pengudah sida dirami ba sebengkah program pejalai khas diatur Raban Indu Keadilan Pampang Miri ditu kemari.
Pejalai sida diuluka Ketuai Pemadah Indu Nengeri Sarawak, Korina Mang disempulang bala kaban bukai datai ngabas seraya nanyaka rita sida ba wad nya sereta ngagihka pemeri.
“Antara pemeri bisi disua baka lampin, set baju anak mit enggau serunding lia ungkup bala indu ti baru udah beranak.
“Kitai mega meri jaku peransang ngagai sida ngambika sida seruran ngasaika diri dikeibuh enggau pengelantang sida diintu meruan,” ku Korina.
Pia mega ku iya, raban indu enda patut ngasaika diri dikelaung tauka dipelakang tang patut nemu hak sida, berani mansutka langgur penemu ti patut sereta panjai runding.
“Kitai indu enda tau enda kering ati lebuh mutarka ruang bilik nyengkaum nyeridi bala anak disempulang pangku pengawa enggau tanggungpengawa bukai.
“Kitai mega ngena pengelebih diri, ari ulah ti mentas, siru, ati kasih nyadika lalau enggau teladan ngagai bala anak,” tandu Korina.
Kena 8 Mac ninting taun dipilih nyadi hari ngenang enggau masa raban indu ti udah besaup gawaka pengelantang ruang bilik enggau nempa modal mensia sereta pemansang ba semua sukut pengawa ngaul sida.
Berambaika jaku ‘Balance For Better’, raban indu dikeandal bela ulih nyingkang mansang sebaka enggau sida ke lelaki kelebih agi negika hak diri pulaika pemaik begulai, ku Korina nyimpul.
