KUCHING: Raban sekula enggau Polis DiRaja Malaysia (PDRM) patut nanggam kerejasama proaktif mutar kes beduan ti majak nyadi ba raban nembiak.
Chairman Mimbar Gerempung Apai Indai Malaysia (MAPIM) Sarawak, Datuk Rozalix Edi Wahab madah, kerejasama ari sukut kimpin nagang penyalah beduan beguna amat lalu patut dipejalai sebarang maya.
Iya madah, PDRM diperansang datai ngagai sekula ngumpul penerang silik sereta meri penerang ngagai nembiak bekaul penyalah nya sereta ukum ngagai sida ti ngereja penyalah nya.
“Ba aku, kes beduan tu endang patut diputar sereta begunaka kerejasama proaktif entara raban sekula enggau PDRM.
“Kelimpah kes beduan, isu makai dadah ba raban nembiak mega patut diberi perati.
“Aku pechaya isu tu bisi nyadi ba sekula. Nya alai, kerejasama nya beguna amat dikena mutar kededua isu tu,” ku iya.
Iya ti mega Focal Person Mungkur Apai Indai, Komuniti enggau Sektor Peribit ba Pelajar (PIBKS) Sarawak madah, raban sekula patut berati enggau bejalaika bemacham chara ti ngasi agi dikena meri penyedar ngagai nembiak.
