SIBU: Dikena mutar penanggul teknikal ti ditapi peminta Bantu Barang Diguna Sarawak (SKAS), S Pay Global deka nganjung raban teknikal khas ngagai mengeri besai di Sarawak, nyengkaum di Sibu.
Inisiatif tu dikena ngelanchar pengawa nganjung peminta sereta ngelempung tating raban ti minta bantu tu.
Sapit Menteri Pengerai Mensia Mayuh, Pengawa Berumah enggau Perintah Lokal Sarawak, Datuk Michael Tiang Ming Tee madah, inisiatif nya dipejalai berindik ari Palan Transfomasyen Mengeri (UTC) Sibu ti ditapat mensia mayuh ari Kapit, Julau enggau Kanowit.
“Penanggul besai nya ba renggat ngenuku akaun nengah Sarawak ID, kelebih agi pengudah gambar sida enda sebaka enggau gambar dalam tinggi.
“Proses tu begunaka timpuh entara 15 ngagai 30 minit ungkup tiap peminta ngujung ke sida laun,” ku Tiang ba aum pemberita pengudah bejadika Community Mental Health Literary, ditu kemari.
Iya madah, UTC Sibu semina ulih ngadu 100 peminta sehari – 50 maya pagi enggau ke bukai muak ke lemai.
Ku iya, pekara tu mar agi lebuh sekeda penguna S Pay Global napi isu akaun enda ulih dibuka ketegal enda ingat ke password.
Raban teknikal ti nadai dia balat nating laban staf UTC semina ulih ngadu pengawa nengah email tauka betelefon ngagai raban bekaul.
“Nengah penatai raban teknikal tu, penanggul ulih diputar lengkas seraya ngelempung tating staf UTC enggau raban minta bantu nya.
