Randau eksklusif bekaul enggau isu-isu di Sarawak

SUARA Sarawak udah ngerandau Kepala Polis Sarawak, Datuk Aidi Ismail pasal isu sereta kes penyalah ba Sarawak tu nyengkaum kes nipu ke majak nyadi, disiplin dalam raban polis, kampar, kes pasung, chara napi Pengawa Bepilih Nengeri (PRN) Ke-12 Sarawak enggau nganjung polis gawa sekumbang Atur Mindah Betagang (PKP) Covid-19.

SUARA SARAWAK : Baka ni tikas kes penyalah ba Sarawak dalam pun taun 2021 naka diatu?

DATUK AIDI ISMAIL : Tikas penyalah naka diatu bisi nurun dalam tiga bulan keterubah taun tu. Naka diatu mega, kami ngemeratka Pengawa Ngempang Jalai enggau matau Atur Pengawa Standard (SOP) bepelasarka pekara dikemerat Perintah Sarawak.

Pia mega, polis Sarawak deka bejalaika kompaun ngagai barang sapa ti agi enda ngasika chara baru tu. Taja pia, bisi sekeda agi enda ngasika atur baka enda ngena sengkabung mua lalu enda nulis nama maya tama ke kedai.
Naka tu, semua penyalah ti nyadi ba Sarawak agi ulih diputar enggau manah. Gerah ari Bukit Aman mega dekaka kami neritka agi atur SJR laban agi mayuh orang enda ngasika atur baka bejalai entara zon taja nadai pengawa ke berat lalu kemar udah berengkah diterit kompaun RM10,000, suba maksimum RM1,000 lalu diatu diubah maksimum RM10,000.

Barang sapa ti dikompaun, sida ke deka minta kurang bayar kompaun nya tau nanya nengah Opis Menteri Pengerai Malaysia (KKM).

SV : Tuju kami sebuat betemu enggau Datuk laban deka ngulihka penerang media kelimpah deka negapka kaul kerejasama entara media enggau polis.

AIDI : Naka tu, kami ngembuan kaul ke chukup manah enggau raban media. Aku mega enda kakang ati meri penerang pasal polis tauka meri penyedar ngagai mensia mayuh.
Penerang enggau timbal mega mesti jampat dibantai laban tu meri pemaik ngagai mensia mayuh enggau menua tu. Ba ditu (IPK Sarawak) bisi sepuluh opis.

SV: Berapa semua staf kita nyengkaum pegawai enggau raban polis ba Sarawak?

AIDI: Nitihka penerang pemadu baru, polis Sarawak ngembuan lebih ari 9,000 iku kaban enggau pegawai polis.
Bisi 10 peratus pangku pengawa nya apin diisi lalu kami ngemeratka orang ukai bumiputera.
Ambika chunto, orang asal raban sida tu deka dianjung gawa ngagai unit khas, pengelebih sida mega deka muntang ke alai sida bisi batalion kediri empu ba Perak. Bansa bukai mega diperansang intebiu nyadi raban polis tu.

SV: Nama inisiatif nambahka peratus polis gawa kelebih agi ba Sarawak?

AIDI: Bukit Aman ti deka bejalaika pengawa ngambi raban polis baru lalu kami semina nerima staf ti dianjung Bukit Aman gawa.

Suba bisi kimpin nambahka staf dalam raban polis. Taun tu lebih ai 300 iku polis ti deka pinchin. Kadang kami begunaka pegawai ari raban bansa bukai kelebih agi dianjung gawa ba sitak komuniti ke sama bansa. Etnik dikategori bumiputera mega.

 

SINDIKET NIPU

SV: Datuk, ulih nuan nerang silik pasal isu penyalah diatu nyengkaum kes nipu, kampar, masung enggau PRN Sarawak?

AIDI: Aku empu kala kena pasal isu nipu tu laban sindiket nya deka ngasuh kitai pechayaka sida dulu.
Chara dikena sida nya endang nyelai dataika kitai ulih kena tipu. Tebal agi, sida deka telefon enggau nyaru diri nyadi polis, orang ba kort ngena lumur telefon ti udah ditukar.

Kami udah mayuh nangkap sida tu di Sarawak. Ba timpuh 1 Januari nyentuk 10 March tu tadi, bisi 367 kes nyadi ba menua tu lalu tebal agi sida ti kena tipu nya baka enda nemu utai enggau takut.

Lebuh udah kena, duit udah abis baru sida ngaga ripot. Enti love scam, kes nya mayuh ngaul peranak menua luar. Naka tu, love Scam ngerikod 30 kes enggau pengerugi RM900,000 di Sarawak.

Kes pemadu mayuh nyadi iya nya duit jali bula. Kes nya bepun ari sida nguji ngaga duit jali baka RM10,000 tang rugi ketegal ditipu lebih ari duit ti deka dijali.

Pia mega, kes nipu nengah internet ke alai pembeli meli barang online tang nadai barang dianjung penyual dikelala dalam media rama nya.

Rikod pemadu baru nunjukka 56 kes udah nyadi enggau pengerugi RM250,000 seraya duit jali bula ngerikod 25 kes enggau pengerugi RM1.5 juta.

Bisi tujuh kes salah guna kuasa enggau pengerugi RM2.9 juta. Love Scam ngerikod 57 kes enggau pengerugi RM47,000. Ungkup tiga bulan keterubah taun tu, semua kes nya ngerikod pengerugi RM8.5 juta.

SV: Nama jaku tangkan Datuk bekaul sindiket tu ngagai mensia mayuh?

AIDI: Kami suah mantaika gerah bekaul isu nya tang enda nemu sekalika mensia mayuh nemu tauka enda. Kebendar, mensia mayuh udah nemu pasal sindiket nipu tang sida enda beratika pekara nya nyentuk utai nya nyadi ngagai sida empu.

Sida kebendar takut, polis enda kala telefon ngagai orang dikena mutarka kes nya tang agi mayuh orang ‘kena panjuk’.

SV: Nama pemar nyidi sida ti ngereja sindiket tu?

AIDI: Kami mujur nangkap 127 iku sida ke bisi kaul enggau keldai akaun nipu tu. Tebal agi, sida enda nemu sapa ketuai ti ngena penerang sida ngaga akaun bank tu.

Mayuh akaun pelesu dikena enggau sindiket tu ngena raban ti tusah nyadi keldai akaun. Polis udah bekerejasama enggau bank ngambi ngelala enggau mansik isu sida ti muka mayuh akaun.

Naka tu, bisi 75 iku udah didawa. Anang berandau enggau orang ke enda dikelala kita lalu enti bisi pengirau ati tau ngelawa ba balai polis besemak.

Bekaul kes pasung, Sarawak dikategori nengeri pemadu tinggi lalu taun nyin kemari, Sarawak ba penuduk keempat tikas kes pasung pemadu tinggi di Malaysia kelimpah ari Selangor, Johor enggau Sabah.

Bisi 140 kes dirikodka ba semua pelilih taun nyin kemari. Bisi 15 kes pasung nyadi ba menua tu dalam dua bulan keterubah taun tu. Tebal agi, kes nya bekaul kes baruh umur enggau diripotka lutur lalu lutur deka ngaga ripot pasal kes pasung nya.

Taun tu bisi siti kes ngaul nembiak di baruh umur 12 taun seraya 14 kes ngaul nembiak beumur 15 enggau 16 taun.
Kes pasung taun tu bisi kurang dibanding 19 kes dirikodka taun nyin kemari. Tebal agi, sida ke masung nya dikelala iya nya bakih tauka kaban belayan dikelala bala nembiak ke dipasung nya.

Kebuah kes tu nyadi ketegal kena parit media rama, kurang dipatau apai indai, seranta enggau kurang penemu pasal seksual sereta adat jadi melaki bini.

Nya kebuah, dua raban kelebih agi apai indai mesti matau pengawa dikereja anak sida lebih agi anak indu.
Maya tu mayuh nembiak enda besekula, engka utai tu ulih nyadi ba rumah lebuh nembiak mai bakih sida pulai ke rumah maya apai indai sida nadai ba rumah.

CHARA NAPI PRN12

SV: Baka ni chara polis napi PRN Ke-12 ari sukut perengkaguna, raban enggau ke bukai?

AIDI: Bepelasarka idup chara baru baka diatu, Komiti Pengawa Bepilih (SPR) udah nyendiaka atur baru maya pengawa bepilih dipejalai.
Atur nya netapka kimpin enda ulih dipejalai beraban lalu maya ngundi, enda tau mayuh orang tama ngagai palan ngundi.

Nya alai, engka mayuh agi palan ngundi disedia ngambi mensia mayuh enda begelumu. Enti palan ngundi ditambah, udah tentu mayuh agi raban polis dianjung gawa, nya kebuah kami deka nganjung abis nadai siku raban polis ba siti palan ngundi nya.

Kami tusah deka ngasuh polis Semenanjung nyaup maya pengawa ngundi laban Perintah Sarawak netapka kuarantin pengelama 14 hari enti datai ari nengeri bukai.

Nya kebuah, kami deka ngena semua raban ke bisi diatu nyengkaum ngena servis Pasukan Gerakan Am (PGA). Ba Sarawak diatu kitai bisi urung 9,000 kaban enggau deka ngena raban ke bisi ngambi matau pejalai PRN tauka Pengawa Bepilih Besai (PRU).

Kami udah nyikap diri kenyau ari taun nyin kemari sekalika ari sukut perengkaguna nyengkaum meri latih ngagai raban enggau pegawai bekaul pengawa bepilih tu lalu semua Indu Opis Pelilih (IPD) udah sedia.
Ungkup polis, kami mesti nyendiaka palan matau nentuka pengawa lanchar dipejalai. Nya kebuah kami deka matau pejalai pengawa bepilih nya empu.

Naka tu, pengawa bepilih diatur ba Sarawak endang nadai penanggul. Semua bejalai lanchar enggau kerejasama mensia mayuh sereta sida ti bediri, nadai isu ke tau ngasuh penyarut nyadi.
Tang kami agi suntuk perengkaguna baka entukar ngujungka kami mesti nyuwa entukar maya pengawa bepilih lalu semua suwa nya beungkus manggai RM3 juta.

Kami mega mesti nentuka genap raban ngena PPE baka karung mua laban kami belajar ari pengawa bepilih ti diatur ba sabah ke alai bisi 18 iku raban kami positif.

GUNA PPE ENGGAU NITIH SOP

SV: Nama inisiatif dikena nyeliahka penusah nya nyadi?

AIDI: Kami deka nentuka raban polis ti gawa ngena PPE enggau nitihka SOP sereta nyaga pemeresi diri laban kami enda nemu kelimpah tebal agi kes positif Covid-19 di Sarawak nya nadai kelai kena rampit.

SV: Bekaul pandemik Covid-19 enggau Atur Mindah Betagang (PKP), Datuk tepantup ati enggau pemuju raban polis Sarawak bejalaika pangku pengawa sida?

AIDI: Covid-19 udah ngerekai lebih setaun lalu kami mega berasai lelak lebuh bejalaika pengawa ngempang jalai, operasyen enggau ke bukai.
Kekadang bisi orang sebana madahka kami enda neritka atur lalu kami ngemeratka pekara sereta udah neritka agi atur.

Ba Sarawak, Perintah Nengeri udah ngempang jalai entara pelilih bebida enggau ba Semenanjung ke semina ngempang jalai entara nengeri aja.
Nya kebuah kami bejalaika mayuh pengawa ngempang taja nadai mayuh kes ditemu semina bisi sekeda orang agi enda ngasika SOP.

SV: Naka tu, berapa iku raban polis di Sarawak kena rampit penyakit Covid-19?

AIDI: Nadai mayuh, bisi kena rampit maya gawa enggau bisi kena rampit sida sebilik enggau ke bukai.
Taun tu, semina tiga iku ditemu positif enggau 282 iku dikurantin, lima iku pegawa kanan ti positif nya udah suman enggau udah gawa baka selama.

Bisi 15 iku pegawai baruh agi diperubat enggau 38 iku agi pegawai baruh udah suman enggau gawa baka selama. Urung 2.9 peratus aja kena rampit igi penyakit tu.

SV: Pasal disiplin polis, bisi tauka enda sida ti dibuai kereja, diketu gawa enda lama enggau ke bukai laban bisi sebana didinga pasal raban polis ngambi duit ari pengereja Indonesia?

AIDI: Bekaul kes ‘pau’ (minta duit sebarang) tu, kami udah mantaika gerah pasal raban polis enda tau ngetan kampar ba endur sida gawa.

Pekara tu enda dikemendar kelimpah bisi operasyen khas begulai enggau ejensi enggau opis perintah, baru sida tau tama ngagai endur Kampar gawa tauka meresa endur sida diau.

Enti raban polis ngagai endur nya kediri, sida enda dikemendar. Enti sida majak kin, kami deka neritka atur bekaul disiplin ngagai sida.

Bekaul kes disiplin ke bukai, tebal agi pasal salah guna dadah, makai suap enggau kes Syariah baka ditangkap khalwat enggau ke bukai.

Taun nyin kemari, 137 keretas pansik dibuka enggau 38 keretas pansik dibuka taun tu. 18 iku ditan gawa enggau lapan iku diketu gawa enda lama.

Ba taun 2020, bisi 17 iku dibuai kereja lalu tiga iku dibuai kereja naka taun tu. Nya alai, kami enggai belembut enti nerima sebana ari mensia mayuh pasal penyalah dikereja kaban enggau pegawai polis.

Kami mega ngenyit bejalaika pengawa beperesa ai kemi ngagai genap pengawa enggau raban polis dua kali setaun. Enti ditemu positif, sida deka diukum nyengkaum dibuai kereja.

Aku ngarapka kaban enggau pegawai polis mesti nyelaihka diri ari penyalah makai suap, minta duit sebarang, salah guna dadah enggau salah guna kuasa laban sida udah dilempaika tanggung pengawa nyaga mensia mayuh.

Aku mega ngelalau pegawai seruran matau kaban polis laban kadang sida napi penanggul baka kusut runding, penanggul ba ruang bilik enggau ke bukai.

Enti kitai laun nemu penanggul ditapi sida, engka sida deka ngereja bemacham penanggul. Pia mega, raban polis mega napi penanggul ngutang ngujungka bisi sekeda ditukuka bankrap.

Taun nyin kemari, bisi 30 kes sida bankrap ketegal ngaga pinjau ari bank sekalika dikena sida empu, kena bedagang enggau ke bukai. Dikena mutarka penanggul tu, kami bisi ngatur kaunseling begulai enggau Bank Negara bekaul chara sida ngena belanja.

Nambahka nya, kami mega udah nagang sida ari ngaga pinjau ba bank. Ambika banding, sida tau ngaga pinjau ba bank enti bisi pemedar ari ketuai polis tang penanggul iya ila, sida deka nginjau ngagai Ah Long.

JUDI ONLINE

SV: Bisi tauka enda raban polis bemain dalam judi online?

AIDI: Naka tu, aku nadai evidens tang kami udah neritka atur kelebih agi sida ti nyual kredit judi online. Kami mega mayuh udah nangkap sida ti nyadi penyual kredit judi tu.

SV: Ulih Datuk nerang pasal penyalah di Sarawak?

AIDI: Kes ba Sarawak agi ulih dipatau laban berengkah ari 1 Januari nyentuk 10 March tu tadi, bisi 860 kes penyalah indeks diripotka dibanding 1,932 kes ba timpuh ti sama dalam taun 2020.
Reti nya, kes diripotka taun tu nurun 1,072 kes tauka 55 peratus. Bekaul kes penyalah kasar mega nurun 122 kes tauka 52 peratus iya nya 111 kes udah diripotka kena 1 Januari nyentuk 10 March tu tadi dibanding 233 kes ba timpuh ti sama dalam taun 2020.

Kategori kes penyalah kasar mega nurun iya nya kes ngerumpak beraban nadai senyata nurun 60 peratus, kes nyamah nurun 23 kes, kes ngerumpak nadai senyata nurun 23 kes enggau kes masung nurun 16 kes.
Bekaul kategori penyalah rega tengkira, bisi 749 kes diripotka ari 1 Januari nyentuk 10 March tu tadi dibanding 1, 699 kes ba timpuh ti sama taun nyin kemari.

Tu mandangka kes nya nurun 950 kes tauka 56 peratus. Sekumbang timpuh pansik, semua kategori kes nurun iya nya kes enchuri nurun 456 kes, kes nyerungkai rumah nurun 271 kes, kes enchuri motosikal nurun 170 kes, kes enchuri entukar nurun 50 kes sereta kes enchuri lori, van enggau entukar berat nurun tiga kes. Kes tu majak nurun engka ketegal empas ari PKP diterit ba menua tu.

SV: Datuk, raban polis ba Sarawak diatu chukup tauka enda?

AIDI: Raban polis ditu endang enda chukup laban pangku pengawa kami tu patut bisi 9,748 iku tang kami diatu semina bisi 9,430 iku aja.

BAYAT DI SARAWAK

SV: Berapa peratus tauka penyalah dikereja gangster tauka apai bayat di Sarawak dibanding nengeri bukai.
AIDI: Naka tu, penyalah dikereja apai bayat di Sarawak agi ulih dipatau lalu tebal agi nyadi di mengeri besai kelebih agi di Sibu, tang kitai nadai rikod pasal apai bayat baka di Semenanjung.
Taja pia, apai bayat tu nadai raban baka ngembuan lambang, pantang enggau ngiga kaban baru. Reti apai bayat tu mayuh agi dikena nyaga dagang orang bukai kelebih agi di Sibu.

SV: Baka ni enggau kes nyundal?

AIDI: Naka tu, kes nya nyau majak kurang lalu tebal agi nyadi di rumah urut enggau palan pemerindang tang diatu rumah urut enggau palan pemerindang bedau ulih dibuka.

SV: Nama berita pemadu baru pasal kes masung indu ti ditan ba lokap polis di Miri?

AIDI: Diatu kes nya agi dipechara ba kort nyengkaum kes masung nya empu enggau enggau dua iku kaban polis ti didawa di baruh Akta Kanak-Kanak.

Enti nitih semua lokap mesti disikap kamera litar tertutup (CCTV) tang dekoder nya rusak ba lokap Miri tu. Kunterikta udah bisi miki dekoder nya lalu kunterikta tu dichiri Bukit Aman empu.

Dekoder nya udah bisi tang apin dipasang ketegal pengerekai Covid-19. Kami diatu benung nukar dekoder tang penyalah nya tadi. Taja pia, diatu dekoder nya udah ditukar.

SV: Nama pemar ditapi polis di Sarawak.

AIDI: Ba Sarawak tu, mensia mayuh idup enggau lantang taja mayuh etnik tang isu bekaul raban bansa enggau pengarap agi ulih diputar kami.

Tang kami naka ulih mutarka penusah nya enti sema bisi isu baka nya nyadi dikena nyeliahka pekara nya makin besai. Kami mega seruran matau media rama baka Facebook lalu enti sema bisi orang ngelesei pengarap enggau raban bansa, kami deka berumban bejalaika atur ke patut.

Tang pemar ditapi kami diatu iya nya nyaga adan menua enggau penanggul kampar tama nengah jalai chit baa dan menua ketegal adan menua entara Sarawak enggau Kalimantan kelalu besai.
Enti deka nutup penuh adan menua nya endang tusah taja bisi pos matau adan menua dipejalai Pasukan Gerakan Am (PGA) enggau soldadu.

Kelimpah ari kampar, kami mega mayuh nangkap tekong. Taun nyin kemari, kami udah nangkap 204 iku iya nya 49 tekong menua tu enggau 155 tekong ari peranak menua luar.

Naka bulan Januari nyentuk March taun tu, bisi 103 iku tekong ditangkap iya nya ngaul 27 iku peranak menua enggau 76 iku peranak menua luar.
Kami mujur bejalaika pengawa perapasan penyampau RM1.2 juta taun tu enggau RM3.5 juta taun nyin kemari.

SV: Tebal agi, kampar ti tama ke Sarawak laban deka ngiga kereja, polis bisi ke enda meresa ba kebun besai.

AIDI: Kami endang bisi meresa kebun besai ke alai raban PGA enggau Opis Imigresyen ti bejalaika pangku pengawa meresa kampar tu ba ladang.

Mayuh kampar ditangkap enggau naka tu, kami nendurka atur ngagai bala pengaji rejister pengereja sida baka kampar ngambi ngulihka permit sereta nentuka pengereja nya nadai kena rampit Covid-19.

Tu nyengkaum nentuka sektor ekonomi enggau pengawa bekebun nyengkaum pengawa ngaga rumah lanchar dipejalai.

SV: Pasal kes makai suap di Sarawak, baka ni kes Ketuai Opis Pansik Penyalah di Mukah baka ti diripotka?

AIDI: Kami udah muka keretas pansik enggau pansik benung dipejalai. Kami mega deka bejalaika semua pansik nyengkaum ari sukut reta dikembuan iya lalu pengawa dikereja iya sebedau tu. Kami mega ngarapka mensia mayuh tauka saksi ulih meri penerang.

Suara Sarawak