MARUDI: Penyelai penyerakup rayat ba Baram meseti nyadi pengering negap semangat kerejasama Malaysia MADANI sereta narak ulah ti manah.
Kaban Parlimen Baram, Datuk Anyi Ngau madah, semangat beserakup ti udah lama ditanggam entara komuniti lokal meseti terus ditegap nyadi pugu pemansang komuniti.
Anyi nibar jaku nya ba Pengerami Makai Lemai enggau Apresiasyen Komuniti MADANI Kampung Pemindahan Marudi ti diatur ba siti restoran.
Ku iya, pengawa numbuh Komuniti MADANI beguna endar dikena ngerapitka agi kaul penyerakup rayat seraya narak semangat begulai ti rat agi dudi hari.
Pengerami nya mega digulu raban Komuniti MADANI Rumah Jelaping Sungai Arang B, Komuniti MADANI Sungai Malang, Komuniti MADANI Rumah Gawong Sungai Selejau sereta Komuniti MADANI Rumah Ganing, Sungai Gudang.
Berebak enggau nya, Pegawai Pemadah Pelilih Marudi, Siti Mariam Mahdar meri terima kasih ngagai bakih strategik ari mayuh opis, ejensi enggau media ke sukung ngemujur program Komuniti MADANI sepanjai taun 2025.
Pia mega, Tuai Komuniti MADANI Kampung Pemindahan Marudi, Hajijah Dolah meri terima kasih ke sukung rat raban komiti ti ransing enggau sedia nyaup ngemujur pengawa maya diguna.
Bela datai, Pegawai Pelilih Marudi, Rose Edward Tarang.
