Rayat Kapit milih sistem lama

KAPIT: Serakup Ketuai Komuniti Iban Pelilih Kapit (Kadicla) sepenemu mantah pengawa numbuhka Komiti Pengatur Genturung Pendiau (MPKK) baka diperambu Perintah Besai.

Ku Chairman Kadicla, Pemancha Steward Sawing, penemu baka nya semina deka mai penyarut kelebih agi ngagai peranak rumah panjai enggau genturung pendiau ditu.

“Semina siti aja sistem dikena ngatur rayat ba rumah panjai tauka genturung pendiau iya nya Komiti Pengelikun enggau Pemansang Genturung Pendiau (JKKK) baka ngelama tu.

“Kami puas ati enggau pejalai sistem ke lama (JKKK) laban nya udah diaum rayat milih ketuai nengah pengawa bepilih nentuka sapa patut nyadi tuai ngatur rumah panjai ti betuaika tuai rumah.

“Nya kebuah kami mantah MPKK ditumbuh ba menua tu,” ku iya madah nyemetak.

Penemu sida sebuat udah dibantai rambau aum bekaul pengawa numbuhka MPKK diatur ba Dewan Suarah, apin lama ke udah.