BETONG: Rayat ke diau ba rumah panjai patut pintar ngulihka penguntung ari tanah diri empu dikena nambahka penatai pemisi.

Sapit Kepala Menteri Datuk Amar Douglas Uggah Embas madah perintah bisi nyendiaka mayuh program ba sektor betupi dikena rayat ba menua pesisir nambahka penatai pemisi.

“Nya alai, aku meransang kita nguna perengka teknologi moden dalam pengawa betupi awakka asil jelu tupi lebih mayuh,” ku iya.

Uggah ke mega Adun Bukit Sabah madah munyi nya ba program nyuaka anak babi ngagai 47 iku penerima ari Rumah Henry Ilon di Senunok seharitu.

Kenu ku iya, pengawa nupi babi tu agi bedau chukup ungkup peranak Dayak di Sarawak.

“Enda dijual ngagai sektor komersial pan babi ke ditupi kita tetap laku, laban peminta ba bansa kitai Dayak maya Hari Gawai endang tinggi,” ku iya.

Nangkan nya, iya mega bisi nerangka pemanah sistem tagang dikena ngelindung ekosistem ti idup ba sungai.

Lalu, ba program kepenudi Uggah bisi meri agih belanja ba baruh Geran Transformasyen Menua Pesisir penyampau RM200,000 ngagai 13 buah pintu rumah panjai dikena ngaga benteng enggau tanju.

Sama bisi datai Direktor Servis Veterinar Sarawak Dr Adrian Susin enghau Sekretari Politik Kepala Menteri Dr Richard Rapu.