Rayat patut milih ketuai ti betul

BAU: Rayat Sarawak patut milih ketuai ti betul ke ulih mai Sarawak nyapai menua ti lebih maju jemah ila.

Sapit Kepala Menteri Datuk Amar Douglas Uggah Embas madahka rayat patut milih ketuai ti selalu nurun padang lalu seruran begulai enggau rayat.

Ku iya, lebuh datai maya pengawa bepilih, bisi parti ke betanding semina nabur semaya tang nadai ulih ngamatka semaya nya.

“Bisi parti ti enggau betanding deka ngaga danji, bisi mega parti ti madah enti sida megai perintah, rega minyak nurun.

“Bisi nurun? Nadai. Baka nya mega enggau danji-danji ke bukai,” ku iya ba Program Community Extension Outreach Program di Balai Raya Kampung Kopit, ensana.

Tambah Adun Bukit Saban nya, pengari rayat Gempung Parti Sarawak (GPS) besemaya ke projek enggau agih belanja ti endang bisi, kesemua program enggau projek dipejalai nitihka pematut.

“Pengawa bepilih enda lama agi, kitai mesti nyaga Sarawak lalu nemu sapa ti amai nyaga enggau mantu menua ngagai pemansang.

“Kitai meda nadai parti bukai ti nyelamatka Sarawak enti ukai GPS,” ku Uggah.

Berebak enggau nya, iya ngelalau rayat mesti beserakup awakka program enggau inisiatif Perintah Sarawak ulih dipejalai enggau manah.

Suara Sarawak