Rayat patut pechaya ngagai GPS

SARIKEI: Rayat patut pechaya ngagai pengulih iring bala ketuai lebih agi anak nengeri tu nengah Gempung Parti Sarawak (GPS), dalam ngemansangka nengeri tu.

Beduduk ari nya, Menteri Muda Pekara Korporat, Abdullah Saidol ngansak anak Sarawak ngambika terus ngetanka hak kelimpah nulak ulah politik bechiping bansa ti ngerusak pengelantang enggau pengelikun.

Ku iya, rayat enda patut terunda-runda enggau penemu politik piak Pakatan Harapan (PH) ti mai ulah politik Semenanjung ti rindu ngangkatka pekara petenah ke enda patut.

“Kitai enggai meda penyarut baka politik Semenanjung ngerampit Sarawak. Nama ke beguna diatu iya nya fokus ngagai pemansang lebih agi ba kandang menua pesisir.

“Ketuai GPS nengah iring Abang Jo, Douglas Uggah, James Masing enggau Dr.Sim sigi enda besemaya bula,” ku iya rambau Pengerami Aram Begempuru ‘United We Can,’ Saberkas Telok Gelam, ditu, kemari.

Ngelansa pasal agenda pemansang ba sitak N42 Semop, Abdullah nyemetak madah, nya ukai bejaku ngapa, bisi pengamat deka digaga baka jematan, Jematan Batang Paloh, Batang Lassa diatu benung digaga.

Tambah mega, ku iya mayuh jalai dalam genturung pendiau benung dikemanah kelimpah ngaga perengkaguna baka balai raya ke baru ke pemaik rayat.

“Perintah Sarawak mega udah ngemendarka bepuluh juta dikena mutar isu ai senggau karan ba sekeda sitak ba Semop. Semua tu ari agih belanja nengeri tu,’ ku iya.

Iya mega madah, penyarut ke nyadi dalam parti PH majak nyadi ngujungka ekonomi menua nadai meruan sereta ngenusah rayat.

“Baka ni PH deka ngiring Sarawak enti sida majak charut. Nya alai, pendiau pegai jemah enggau dini Sarawak meseti ditentuka peranak Sarawak empu,” ku iya.

Berebak enggau nya, Kaban Parlimen Tanjung Manis, Yusuf Abd Wahab madah agih belanja ari Perintah Besai mimit amat lebih agi ungkup rayat menua pesisir.

“Iya ke mayuh agi belanja tu datai perintah Sarawak empu. Nya alai, rayat anang mudah arapka semaya ketuai PH ke mayuh enda dikeamat kelimpah udu bejai perintah ke dulu suba,” ku iya.

Berebak enggau nya, Abdullah bisi nyuaka pemeri RM 16,484 ungkup Saberkas Unit Teluk Gelam dikena meli set kereban muzik, siti set generator, dua iti injin rumput, empat unit wayar penyambung, 200 unit bangku plastik, 10 unit mija lipat, empat unit kipas, siti unit LCD Projektor enggau siti set papan burak.

Pia mega JKKK ari tiga buah rumah panjai bisi nerima agih RM9,200 kelimpah pemeri kain ngagai Exco Indu PBB Telok Gelam.

Nangkan nya, Yusuf bisi ngungkupla RM 4,600 ngagai JKKK tiga buah rumah panjai nya.

Udah nya, Abdullah bisi ngemendarka siti unit mija ping pong enggau gelanggang futsal, ditangkang Yusuf meri dua jelatung melepung ungkup peranak Telok Gelam.