Rayat S’wak lebih nemu utai dikedeka sida

SRI AMAN: Semina rayat Sarawak aja nemu sereta meretika peminta sida ba menua tu.

Nya kebuah ku Menteri Muda Pengelantang Komuniti, Datuk Francis Harden Hollis, Parti Sa’ati Rayat Sarawak (SUPP) nyukung juluk Perintah Sarawak naka ulih ngambi pulai hak Sarawak.

“Kitai nagih hak Sarawak dipulaika baru baka disempekat di baruh Sempekat Malaysia 1963 (MA63).

“Kebuah pia laban kitai nyadi rayat Sarawak meretika peminta diri empu,” ku Harden.

Iya mansutka jaku nya lebuh pengawa nikika tambai SUPP beserimbai enggau ngintu Genap Taun Ke-60 Renggat Pampang Lingga di Rumah Ipan, Pruan B ditu, apin lama ke udah.

Pengawa nikika tambai parti tu mega diserumba Pengerami Nerima Pengabang Gawai Komiti Pemansang enggau Pengelikun Genturung Pendiau (JKKK) Rumah Ipan Pruan B.

Kenu ku Harden, pengawa nikika tambai SUPP diperati ukai semina dikena ngerami tang mega ulih ngedutka tanggam kaul entara sida.

“Enti kitai beserakup, kitai deka ngembuan tuju runding ti sama iya jya ngenegapka sukung ngagai parti.

“Kitai naka ulih nagih hak Sarawak dipulaika baru baka disempekat dalam MA63,” ku iya madah nyemetak.

Dulu ari nya, Chairman SUPP Pampang Lingga, Kaunsilor Waterkiller James Junit madahka tu pengerami keterubah diatur laban ngelama tu sida begulai enggau SUPP Pampang Simanggang.

“Nya alai aku meri tabi puji ngagai raban ti udah mujur ngatur diserumba enggau pengerami nerima pengabang,” ku iya muji.

Berebak enggau nya, Harden bisi nyuaka pemeri penyampau RM3,000 ngagai JKKK Rumah Ipan dikena melanja pengawa gerempung sida.

Sama datai Temenggong Kueh Aik Seng, Pemancha Micheal John, Penghulu Joseph Lichong sereta bala temuai bukai.

BEJADI … Harden disempulang bala bukai nyirap kek beserimbai enggau Pengerami Nerima Pengabang Gawai JKKK Rumah Ipan Pruan B di Sri Aman apin lama ke udah.