Rayat tinggal pemansang enti nadai jalai

SEBUYAU: Urung 65 peratus peranak di menua tu diau mendam ba menua pesisir lalu begunaka infrastruktur pemun kelebih agi jalai alun.

Sapit Kepala Menteri ti mega Menteri Infrastruktur enggau Pemansang Penyangkai Kapal Tan Sri Datuk Amar (Dr) James Jemut Masing madahka pemansang lubah datai enti nadai jalai.

“Perintah naka ulih ngerumban pengawa ngaga jalai ba kandang menua pesisir awakka peranak dia enda jauh tinggal pemansang.

“Nya alai, enti jalai enggau jematan mayuh digaga neresa sungai besai, mayuh agi ga menua kena pansa jalai tu,” ku iya.

Masing bejaku munyi nya ba Program Nasih Tanah Jematan Batang Lupar ti dipenyadika Kepala Menteri Datuk Patinggi Abang Johari Tun Openg ditu tadi.

Suara Sarawak