KEMAYA hari tu kitai ulih meda industri muzik lokal majak richah dipasuk mayuh penanyi biak bepenau.

Enda nyalah baka kulat ti tumbuh pengudah ujan lalu tu siti pengerembai ti chukup manah sereta ulih mai empas positif ngagai industri tu.

Ukai semina mantaika penau rebak biak ba pengawa belagu aja tang tu ulih nyagu ke industri muzik lokal ngagai tikas ti tinggi agi.

Raymond Lori siti nama ti agi baru bendar ba dunya pemerindang Dayak lalu apin dikelala mensia mayuh.

Iya baru ngukir nama diri ba panggau tu nengah lagu single keterubah iya ti pejuluk Enggai Ke Semengat Layu.

Lagu nya mujur dikeluar nengah pelasar YouTube Golden Pearl Recording Studio Sdn. Bhd (GPRS) kena 19 March tu tadi.

Ba timpuh tiga minggu udah dikeluar, lagu nya mujur dipeda ba penyuah urung 4,000 kali enggau dikerindu ke lebih 100 iku.

BEKALIH ATI

Lagu ditengkebang siku penengkebang leka lagu ti mega siku artis Dayak, Lakuang Ading nya ngenang pengeran siku lelaki ngagai sulu ati iya.

Sekali gelumpang mangka ngempas ke pantai, dia pantai nya deka berubah lalu nya siti sempama tuai ti chukup nemban dikena nusui kisah dalam lagu nya.

Bepelasarka kisah dalam lagu nya, dua iku sulu nya udah lama nanggam pengerindu tuchi tang enda memukai biau balai mangka dia ati indu nya ngenyit bebali.

Pengerindu manis asai madu ngelama tu diatu nyau tabar nadai agi pemanis baka lauk ti nadai digerami biching enggau garam, ta penat tatat asai.

Anchur mih ati lelaki nya meda ulah sulu ati iya kempang amat ngayah ke iya, mimit pen nadai mih iya nyangka pengerindu seduai tau jelungan baka nya.

Laban ngelama tu seduai begulai chukup romantik kelimpah ibuh enggau ngemeratka pangan diri.

Lelaki nya balat anchur, mayuh tanda tanya bemain dalam runding enggau ati iya.

Kati tau baka tu? Nama kebuah iya jampat amat bekalih ati? Nama penyalah enggau pengilap udah digaga aku ngelama tu?

Bemacham tanya ayan ngeregau dalam runding enggau ati iya. Nyerauh! Manjung! Nesal! Ngeransi!

Pengerindu ti chukup diasika iya ngelama tu kempang amat ninggalka iya kediri lemas ba lubuk dalam.

Tekapai-kapai mih lelaki nya lemas dalam tasik pengasa ti naban ke seput tangkai ati iya.

Raymond madah, lelaki nya sayau amat ngagai sulu ati iya sereta besemaya deka ngibun iya nyentuk ke tuai.

“Andal mih lelaki nya ulih begulai lantang enggau sulu ati tampun puji iya jadi melaki bini baka orang bukai.

“Seinchi nadai mih lelaki nya ngadang, pengerindu seduai ti ami ngelama tu nyau kusi majak rangkai.

“Indu ti bangat diasika iya ngelama tu kempang amat beduan menyati pengerindu seduai.

“Ketegal lelaki bukai, lelaki nya nyau ditempaya pia aja baka gari utai ti enda diguna.

“Tang…ketegal penyayau pemadu besai enggau enggai beserara, lelaki nya sanggup ngambi sulu ati iya nikal pulai.

“Ngelama tu, tusah senang bela udah diasai, pait manis semua udah diasaika seduai begulai…tu mih ngasuh lelaki nya keran amat deka ngambi sulu iya pulai baru.

“Tang nama daya iya, jari iya enda datai…indu nya nyau jauh ninggalka iya nitih lelaki bukai,” ku terang Raymond.

ANANG BEDUAN

Berindik ari kisah dalam lagu nya, penanyi beumur 39 taun nya ngelalau mensia mayuh kelebih agi sida ti benung nanggam pengerindu belajar ari kisah nya.

Iya madah, kisah nya ngajar kitai enda baka kachang ti enda ingat ke kulit diri.

“Kembuan mih ati ti lurus lebuh besulu lalu anang sesekali ngemudi enggau ngelebuka ati orang ti beamat-amat sayau ke kitai sereta nerima pengurang enggau penimpang kitai.

“Enti kitai agi kakang sayau ke siku orang, manah kitai beterus-terang ari pun, anang nganti orang nyau beabis ati sayau ke kitai, dia kitai ninggalka iya pegi.

“Sebedau nuan ngaga baka nya, uji manah agi nuan ngengkahka diri ba penuduk orang nya.

“Tanya diri empu…kati deka nuan nyema ditempaya ke orang baka nya? Tentu nuan enggai enda pia?

“Nya alai, enti nuan enggai, orang bukai pen enggai.

“Seagi-agi seput bedau padam, seagi-agi nya mih kitai sayau ke pangan diri,” ku anak pengkuan ari lima iku diri menyadi nya ngelalau.

Lebuh nyadaka lagu nya, Raymond madah ke diri chukup gagit, andal, temegah enggau ransing laban lagu nya besai bendar reti ba iya.

Kebuah pia, ku iya, lagu nya mih singkang keterubah iya ba dunya pemerindang.

NGUJI NASIP

Hari siti, enda memukai Raymond bisi tepeda ke iklan ari page Facebook Golden Pearl ti deka ngiga penanyi bepenau.

Laban ti rindu belagu seraya nguji ke nasip diri, dia iya betanya terus ngagai siku kaban GPRS, Valentino Paul sereta nanya iya pasal pekara nya.

“Berengkah ari nya, aku pen bekunsi pengerindu aku belagu sereta juluk aku ti deka ngeluarka lagu diri empu.

“Udah nya, raban GPRS meri aku peluang ngamatka juluk diri tu nengah lagu Enggai Ke Semengat Layu,” ku tusui Penulung Akauntan nya.

Pengerindu ba pengawa belagu nya berengkah dikembuan iya kenyau ari jeman agi sekula primari suba lalu majak galak nyentuk sehari tu.

Laban ti angkun mekuh pengawa nya, dia Raymond chakah masuk bemacham pekit belagu ti bisi diatur.

Nya nyengkaum Pekit Belagu Gawai Dayak 1997, Pekit Belagu Fun Fair Sri Aman, Audisyen Belagu My Star LG Kota Kinabalu, Audisyen Akademi Fantasi Kuching enggau mayuh agi ti bukai.

Pia mega, lebuh bisi pengerami sekali ke nya di rumah panjai, pengerami sekula tauka program perintah, iya suah amat belagu merindang ba atas panggau.

MERI INSPIRASYEN
Nangkan nya, iya madah, laban ti agi baru mekuh pengawa merindang, iya apin ngasaika pait-manis begelar siku artis.

Taja pia, iya ngarapka pejalai singkang iya ba dunya pemerindang tu lanchar enggau nadai napi penguji besai.

Lebuh ditanya sapa ti nyadi inspirasyen iya mekuh pengawa tu, Raymond madah, iya rindu amat ninga lagu Ricky Andrewson, Jenarino Jeraki, Lakuang Ading enggau Stevenson.

“Sida ngembuan pengelebih enggau penyelai kediri empu lalu nya kebuah aku rindu ninga lagu sida.

“Nya alai, sida mih nyadi inspirasyen aku mekuh pengawa tu sereta nyingkang belubah nunda singkang sida.

“Ngena peluang tu mega, aku meri besai terima kasih ngagai menyadi kitai Lakuang Ading laban iya mayuh ngajar aku ari sukut vokal,” ku iya.

NYINGKANG JAUH

Ngenang juluk diri dudi hari, artis asal Kampung Tuba, Simunjan nya madah ke iya deka nyingkang jauh agi ba pengawa merindang.

Iya ngarapka diri majak dikelala mensia mayuh lalu lagu iya lekat ba ati bala peminat lagu Dayak.

Pia mega, iya ngarapka diri bulih mayuh agi jereki dikangau merindang ba mayuh palan merindang.

Tampung iya, ba timpuh ti semak tu, iya deka ngeluarka dua tauka tiga iti lagu ba baruh perabung GPRS sereta nyimpan juluk deka ngerikod enggau ngeluarka lagu Gawai begulai enggau bala artis bukai ba taun dudi.

Ku Raymond, industri muzik lokal kemaya hari jauh amat udah berubah, maju agi ari 10 taun ti udah sereta dipasuk mayuh artis biak bepenau.

“Pemansang teknologi digital kelebih agi media sosial baka Facebook, YouTube, TikTok, Instagram enggau ti bukai balat mantu ba pengawa ngelaku lagu sereta artis lokal.

“Nya alai, aram kitai begempung enggau seati nyukung bala artis sereta industri muzik kitai tu ngambi terus mansang ke mua lalu nyapai penyulut ti besai agi,” ku iya.

Sebedau ngujungka randau, Raymond ngena peluang tu meri terima kasih ngagai semua orang ti nyukung sereta besampika pejalai iya ba dunya pemerindang tu.

Iya madah ke diri chukup temegah, gaga enggau gagit meda sukung tegut ari bala peminat, bakih, bakih sama industri enggau sida sebilik.

“Aku mega meri terima kasih ngagai raban GPRS nyengkaum Lakuang Ading, Jennarino Jeraki, Jenny Tan enggau Valentino Paul ti udah mantu aku ngamatka juluk diri ba pengawa tu.

“Jasa kita semua enda ulih aku balas tang aku ku besampi Tuhan terus merekat semua kitai laban semina Tuhan aja ulih malas semua nya,” ku Raymond netak randau.