Rebak baru diseridi ari umur biak

Sains-Matematik ngena Jaku English

“Jaku English tu beguna amat dikena nyikap rebak baru meretika penemu Sains enggau Matematik kelimpah ngansah pengelandik sida bejaku.” – Ali Biju.

SARATOK: Subjek Sains enggau Matematik diajar ngena Jaku English ngagai nembiak Primari Satu berengkah ari taun baru endang pekara chukup manah ngagai sistem pelajar kitai, ku Kaban Parlimen Saratok Ali Biju.

Ku iya, nembiak ari umur biak diseridi enggau diajar ngena Jaku English belajarka penemu kededua subjek nya deka jampat nangkap utai dipelajar sida.

“Jaku English tu beguna amat dikena nyikap rebak baru meretika penemu Sains enggau Matematik kelimpah ngansah pengelandik sida bejaku.

“Kebuah pia laban kitai berundingka Jaku English tu jaku penemu dikena ba serata dunya ti dikumbai jaku ekonomi lalu kitai patut nitihka singkang pemansang dunya kemaya hari.

“Taja pia, kitai endang enda deka ngelaungka Jaku Melayu ti dikemeran ba sistem pelajar nasional menua tu,” ku iya madah nyemetak.

PENATAI DIANTI… Haji Yusuf (dua kiba) disempulang bala bukai ngambat penatai Ali Biju ba laman sekula.

Iya mansutka jaku tu ba mua mayuh lebuh Bejadika Pengawa Nutup Kem Penyulut UPSR SK Empelam di Anjung Bestari ditu, ujung minggu tu tadi.

Ba lansa bukai, Ali madahka diri bisi tagit besai ke alai iya nagit nembiak deka nyapai penyulut 100 peratus ba peresa UPSR.

“Besai amat pengandal aku deka meda rebak baru kelebih agi nembiak sekula tu nyapai penyulut ba pelajar lalu ulih ngubah pengidup sida, nyaup ngemansangka menua.

“Kem Penyulut UPSR ti diatur lalu tembu sehari tu (Hari Minggu) endang nadai tuju bukai kelimpah ngandalka pemujur enggau penyulut bala kita (nembiak) ti deka napi peresa besai enda lama agi patut udah sedia.

“Aku ngarap bala kita mega sedarka pemesai pangku pengawa enggau tanggungpengawa nyadi rebak ti deka nyadi ketuai menua jemah,” ku Ali ti mega Kaban Kunsil Nengeri (Adun) Krian.

KEMERAH… Ali nabi bala nembiak ti ngelalu penatai iya ba Anjung Bestari sekula nya.

Pia mega ku Ali, kerejasama entara piak sekula enggau apai indai beguna amat nentuka pemansang pelajar nembiak ulih dijapai.

“Penyulut nembiak ba sekula tu asil ari pengepuh enggau pengeliat ati bala pengajar nyeridi pemanah ulah enggau ngiri penemu dikena nempa modal mensia ti menyadi dudi hari.

“Kitai mega nemu, sida ti udah lama gawa nyadi pengajar tu ngembuan penemu, peneleba enggau penau ngajar sereta ngembing nembiak nuju pengidup nyadi mensia menyana,” ku Ali madah nyemetak.

Pemujur diaku nyadi sekula pemadu nyulut ba pelilih Saratok pengudah ngerikod Indeks Penyulut Pengawa (KPI) ngelui ari 90 peratus ngayanka bala pengajar naka ulih nempa pemujur ngagai bala nembiak nengah ajar ti ngasi.

Pia mega ku iya, pemujur tu mega berindik ari sukung teguh apai indai ti seruran besukung enggau besaup sereta nadai kala belampung tulang ngemujurka semua pejalai program enggau aktiviti diatur ba sekula.

KETUAI JEMAH… Ali dipebasa nyuaka setipikit penyereta Kem Penyulut UPSR.

Kerejasama entara bala apai indai enggau komuniti beguna amat nentuka sekula nya likun endur anak sida besekula.

Ngelansa pasal pemansang pemadu baru ba sekula nya ku Ali, sida mujur nirika begunan baru ngena Sistem Binaan Berindustri (IBS).

Nambahka nya ku iya, sekula tu udah nempa sejarah pengudah mujur nempa nembiak ti mujur ngagai tikas ke tinggi agi.

Nya kebuah, kitai minta sida numbuhka Alumni ngambika ulih ngerapitka kaul entara ex-nembiak enggau piak sekula seraya besaup mantu pekara ti patut ba sekula nya.

“Agih belanja besai mega bisi disedia Perintah Besai dikena nyeleti sekula repuk selampur Sarawak.

“Aku ngarapka agih belanja tu ulih ngerumban pengawa nyeleti sekula ngambika bala nembiak ulih belajar ba rampa ti likun enggau lantang,” ku iya nampung.

Berebak enggau nya, Ali dipebasa nyuaka setipikit ngagai bala penyereta kem enggau anugerah penyereta pemadu manah.

Ali mega udah ngemendarka bantu penyampau RM10,000 ngagai Gerempung Apai Indai enggau Pengajar (PIBG) dikena ngemujurka aktiviti sida baka kem penyulut UPSR tu.

“Kitai mega deka merambu lalu berundingka chara ngiga belanja dikena nyeleti begunan Anjung Bestari baka bebelika ramu berumah baka papan, atap zink enggau dik,” ku iya.

Sama datai Kepala Pengajar (GB) SK Empelam Haji Yusuf Johari, Ketuai Kampung Johan, Kaunsilor Bujang Musa, PK1 Juliha Ibrahim, bala pengajar, apai indai sereta bala bukai.