KUCHING: Rega baja ke niki ngenyit ba makit dalam menua enggau dunya diatu udah nyadi isu besai ti ngenusah raban orang bumai.

Sapit Menteri Pemansang Kebun enggau Komoditi II Datuk Willie Mongin raban sida udah baum enggau Gerempung Industri Baja Malaysia (FIAM) bekaul enggau pekara nya.

Ku iya, entara kebuah besai ngujungka ungkus baja niki udah dikelaka FIAM iya nya tebal agi baja diimport ari menua luar lalu rega baja import tu bepanggai ngagai rega ke maya hari nitihka makit entarabansa.

“FIAM mega madah stok baja ba Malaysia endang diimport magang ari menua luar semadi baja kimia bansa ke beleka urea (granular urea) digaga kediri ari PETRONAS Chemicals Group Berhad,” ku iya.

Iya madah munyi nya ba aum pemberita pengudah ngulu randau enggau raban
FIAM bekaul enggau kebuah ti ngujungka rega baja niki ngenyit ba mkiit dalam menua enggau dunya kemaya hari tu.