Rega sengkabung mua ditetap RM1.50 siti

PUTRAJAYA: Perintah netapka rega makit baru sengkabung mua RM1.50 siti bepun 1 April tu, pia ku Menteri Kanan (Kluster Pengelikun) Datuk Seri Ismail Sabri Yaakob.

Iya madah, rega baru tu mudah ari dibanding rega lama sebedau tu berega RM2.00 seunit.

“Sengkabung mya enda dikeluarka mayuh ba menuab tang tebal agi diimport, nya kebuah kitai nitihka rega ti diimport.

“Kitai deka terus beratika rega tu enggau enti ditemu rega ti dibeli udah nurun ari rega diatu, kitai deka beratika baru pekara tu enggau madahka rega baru,” ku iya.

Ismail mansutka jaku nya ba aum pemberit pengudah aum Komiti Khas Menteri-Menteri Pasal Atur Tagang Pejalai (PKP), ditu lemai tadi.

Berebak enggau nya, lebuh ditanya sekalika perintah deka netapka rega hand sanitizer, Ismail Sabri nerangka pekara nya deka diperunding begulai enggau Opis Menteri Dagang Dalam Menua enggau Pekara Penguna (KPDNHEP) enti sema bisi pematut.

Ku Ismail, pekara ke nyadi bekaul enggau rega hand sanitizer tu bebida enggau rega sengkabung mua laban barang nya bisi bansa ti bebida.

“Naka diatu, KPDNHEP apin netapka rega hand sanitizer laban barang nya bisi mayuh bansa enggau rega iya engka bisi bida laban bisi diimport lalu bisi dibeli ba menua tu.

“Nya kebuah, kitai nadai netapka rega hand sanitizer lalu bebida enggau sengkabung mua.

“Tang, aku deka berundingka pekara tu enggau piak KPDNHEP enti bisi pekara ke patut diperunding,” terang iya.

Suara Sarawak