KUCHING: Raban pedagang chara online dilalau ngerejista dagang sida nengah Komiti Serikat Malaysia (SSM).
Menteri Dagang Entarabansa enggau E-Dagang Datuk Sri Wong Soon Koh ngelalau semua pedagang ke bisi kaul enggau ekonomi digital patut ngerejista dagang sida ba eka dengan SSM.
Iya madah munyi nya rambau nyimpul jurai opis menteri iya ba Aum Dun Ke-18 ditu, kemari.
“Kebuah baka tu laban peluang dagang enggau pengawa puang ke bisi disedia nengah aktiviti e-Dagang ngeluie ari adan.
“Tu mega beguna ngagai pedagang chara online patut ngerejista diri ba SSM ngambi ulih ngasai mayuh perengkaguna ke bisi disedia,” ku Soon Koh.
Entara nya, ku Soon Koh, dikena ngemuntang penguna enggau orang ke meli bulih penerang ke betul ari portal SSM.
“Tang taja pia, edagang ke bisi ati deka ngerejista dagang sida dibaruh SSM meseti ngembuan adres berejista di Semenanjung Malaysia.
“Kebuah pia laban Akta Pendaftaran Perniagaan 1956 semina diaku ba Semenanjung Malaysia.
Seriris enggau nya, ku Soon Koh, Opis Menteri iya enggau Opis Menteri Pemansang Industri sereta dagang ( MIED) ngaga siti program khas iya nya program begulai enggau SSM sereta ejen ke udah dipadu endur ngerejista pengawa nya.
“Nengah program tu, kaunter khas ungkup ngerejista dagang chara online disedia ba SSM Sarawak.
“Lebih 200 pedagang udah ngerejista diri bedagang chara online nengah program tu,” ku iya.
