Rh Jepun, Rh Japok enggau Rh Sat nerima kuasa karan 24 jam

JULAU: Tating belanja ke ditapi peranak tiga buah rumah panjai ngelama tu ba Julau ngelama tu nyadi lempung pengudah rumah sida disikap kuasa karan 24 jam nengah Skim Alternatif Kuasa Karan Sarawak (Sares).

Bala tuai rumah ba tiga buah rumah panjai nya meri terima kasih ngagai Perintah Sarawak ti udah meri penampak ngagai rumah panjai sida iya nya ba Rumah Jepun, Rumah Japok enggau Rumah Sat.

Tuai Rumah Jepun Jamin madahka skim tu udah mantu sida nadai agi bebelika minyak injin api laban rega minyak mar kelimpah sida semina orang bumai enggau nadai penatai pemisi tetap.

“Kami berasai lantang laban nadai agi bebelanja mayuh dikena meli minyak,” ku Jepun.

Iya mega madah, sida diatu ulih ngena perengka karan sebarang maya enggau ngasaika pengelantang.

Tuai Rumah Japok Imang mega setujuka pekara dipadahka Jepun, seraya madahka rumah panjai sida ulih ngatur mayuh bengkah aktiviti enggau program komuniti laban sida badu irauka kuasa karan.

“Kami mega ulih nyimpan utai empa lama agi ba dalam peti ais enggau mansutka utai empa nya lebuh bisi pengerami lalu enda irauka iya but baka dagin chapi enggau manuk,” terang iya.

Tuai Rumah Sat Andil mega meri terima kasih ke bantu tu laban iya ngasaika rumah panjai sida likun agi enggau enda bekenaka api kelita lebuh nadai injin api.

Ku Sat, semua peranak dia patut bejimat lebuh bekenaka perengka karan enggau masang wayar karan nitihka pematut awakka penanggul dudi hari.

Pengawa nyuaka Sares ngagai tiga buah rumah panjai tu udah dipenyadi ba Rumah Jepun.

Pengawa tu mega udah dipenyadi Menteri Muda Utiliti (Bekal Kuasa Karan Menua Pesisir) Datuk Liwan Lagang.

Sama datai Adun Meluan Rolland Duat Jubin, Pemesai Opis Pelilih Julau Louis Yan Soon Gang enggau Sapit Presiden Sarawak Energy ungkup Kuasa Karan Menua Pesisir, Dr Chen Shiun.

Ba pengawa nya, Liwan madahka Sares tu sebagi ari Pelin Besai Bekal Kuasa Karan Perintah Sarawak ti dipejalai ba taun 2016.

“Lebuh Sares tu dipejalai, beratus genturung pendiau enggau rumah kelebih agi ba menua pesisir udah disikap kuasa karan nengah sares kelebih agi kuasa solar,” ku iya seraya madahka Pelin Besai Kuasa Karan tu deka nyapai pemujur semua genturung pendiau disikap kuasa karan ba taun 2025.

Nambahka nya, Liwan mega udah nyuaka setipikit ngagai tiga tuai rumah kelai projek nya ulih dikena sida.
Sares tu siti ari projek nyendiaka bekal kuasa karan ngaul komuniti ngambi disikap kuasa karan 24 jam.

Pengudah projek tu mujur dipejalai, raban sares deka nampung pengawa meri sukung teknikal enggau ngajar komuniti sentang chara ngena sistem tu.

Kelimpah ari nya, genturung pendiau ti jauh ari grid deka disikap enggau kuasa karan nengah Sares nyentuk ulih nyambung infrastruktur ngagai genturung pendiau.

Suara Sarawak