Riman: Peransang ari diri sebilik tau ngasuh gerai

Peransang ti positif ari diri sebilik mayuh ngujungka pesakit riman gerai

KUCHING: Jaku peransang ari diri sebilik ngena penemu ti positif mayuh ngujungka pesakit riman mujur gerai ari igi penyakit nya.

Presiden Society Cancer Advocacy Awareness Kuching (Scan) Sew Boon Lui madah iya kala napi penanggul ditepan penyakit riman tusu.

“Penguat mental enggau sukung kami sebilik ngujungka aku ransing ati deka gerai.

“Dua iku anak aku nyadi kering semangat ngasuh aku ngelaban igi penyakit tu laban aku deka meda seduai besai,” ku iya.

MESTI BESUKUNG…Sew Boon Lui (dua kiba), Datin Dayang Mariani Abang Zain (tiga kiba) enggau Dayang Rawdiah Awg Mahmud benung bekunsika penemu bekaul riman ngagai Menteri Pengintu Pengelantang Pendiau, Komuniti, Indu, Ruang Bilik enggau Pemansang Anak Mit Datuk Sri Fatimah Abdullah ba Begunan Baitul Makmur ditu, kemari.

Sew madah siku-siku mensia patut nemu ni bagi penatai semengat sida lebuh dituntung penusah baka ari bini tauka laki, bala anak, apai indai enggau utai bukai ti tau ngasuh semengat nyadi kering.

Kelimpah ari nya, siku agi kaban Scan ti kala napi penyakit riman tusu iya nya Penyanding Penemu Scan Datin Dayang Mariani Abang Zain madah anang belalai lebuh dituntung penusah.

“Lebuh dipadah pasal penyakit tu aku enda malu betemu enggau lutur.

“Semua kaban belayan ditesau awakka meri sukung ngagai aku, dia aku bulih pengering,” ku iya nusi.

Iya mega mesan anang ngelubah diri beperesa ngagai lutur enti bisi nemu tanda-tanda riman laban ba renggat tumu penyakit tu ulih diubat.

Nangkan nya, Komiti Scan Dayang Rawdiah Awg Mahmud madah anak lelaki iya mati dua taun udah lalu ketegal penyakit leukemia.

“Penyakit riman datai ari mayuh bengkah baka genetik, pemakai, darah, kusut runding, tubuh enggau ke bukai.

“Umur anak aku maya nya baru 20 taun tang nadai ku enggau aku nerima iya pegi dulu nya kebuah aku enggau Scantu awakka ulih nyeliah orang bukai nerima nasit baka aku,” ku iya sinu.

Dayang madah, pesakit ti napi penusah riman anang putus pengarap tang ngiga jalai mutarka penanggul nya.
Barang sapa deka nemu pasal Scan tu enggau silik tau ngelawa ‘facebook’ sida ba fb.com/scankch tauka website www.scan.org.my.

Ba website nya mayuh kunsi ari sida ti kala napi penyakit riman lalu nusi baka ni sida ngelaban igi penyakit riman nyentukka gerai.

Suara Sarawak