RM15,000 ungkup Klinik Ng Budu

SARATOK: Sepenyampau RM15,000 diagih kena bebelika kereban perubat enggau nyeruri begunan Klinik Pengerai Nanga Budu.

Sapit Menteri Pengeluar Kuasa enggau Pengeraja Asal, Datuk Ali Biju madahka klinik nya beguna amat nentuka pengerai mensia mayuh ulih dijaga enggau diintu meruan.

Ku iya, peranak ari lebih 50 buah rumah panjai ke bisi ngelingi menua nya endang bepanggai ba servis perubat ke bisi disediaka ba klinik nya.

“Beguna amat nentuka klinik enggau staf ditu ulih gawa baka selama laban tu mih palan perubat pemadu semak enggau rayat rumah panjai di menua pesisir.

“Tu nyengkaum sida ke diau mendam di kandang menua Krian Ulu, Batang Budu, Batang Kabo, Batang Budu, Krangan Rusa enggau Babang,” terang iya.

Ali ke mega Kaban Parlimen Saratok mansutka jaku nya rambau pejalai nemuai ngagai Klinik Pengerai Pelilih Mit Nanga Budu, ensanus.

Beserimbai enggau pejalai nya, iya bisi dipadahka pasal pengawa dipejalai ba klinik nya, penyampau tubuh pegawai tauka derisa ke gawa enggau statistik pesakit ti udah diperubat dia.

Nya alai Ali ngarapka bantu diberi nya ulih nyaup raban ke gawa dia bejalaika pangku pengawa sida enggau sikar agi.

“Klinik tu mih endur keterubah ditapatka sida ke sakit sebedau ditaban berubat ngagai sepital besai agi enti sema sakit raya.

“Ditu mega endur bala ari rumah panjai datai beperesa pengerai ninting bulan, ngambi ubat enggau ke bukai.

“Nya alai aku ngasaika kereban perubat ba klinik tu mesti ditambah lalu begunan klinik patut diseruri ungkup pengelantang enggau pengerai semua.

“Aku deka semua nemu servis pengerai di menua pesisir tu semampai diberi perati enggau dikemerat,” ku Ali ke mega Adun Krian.