RM170,000 udah diagih dikena matih pengajar Sains, Matematik

KUCHING: Perintah nengeri udah ngagihka belanja RM170,000 dikena matih pengajar dalam subjek Sains enggau Matematik.

Menteri Pelajar, Sains enggau Pansik Teknologi, Datuk Michael Manyin Jawong madah opis menteri iya udah bejalaika tanggungpengawa dikena ngelatih pengajar ke ukai ngajar subjek Sains enggau Matematik tu berengkah ari taun 2018.

“Tu dikena matih bala pengajar enggau penemu enggau pengelandik dalam ngajar nembiak bekaul enggau dua bengkah subjek nya.

“Tu chukup beguna laban nembiak tau bulih penemu ti salah sereta enda fokus ngagai dua subjek nya enti sida diajar enggau chara ti salah,” ku iya.

Manyin madah munyi nya rambau nyimpul jurai Opis Menteri Pelajar, Sains enggau Pansik Teknologi ba Aum Dun Ke-18 ditu, kemari.

Nangkanka nya, ku Manyin, dikena nerenakka penau ngagai pelajar Sains, Teknologi, Engineering enggau Matematik (STEM), opis menteri iya chukup beterima kasih laban tiap bengkah palan pelajar tinggi, Institusyen Pelajar Pengajar (IPG), ejensi nengeri sereta sekula ba nengeri tu sama ngaga aktiviti ngelakuka STEM.

“Dikena nyukung proses ngajar dalam kelas, opis menteri tu ngaga siti projek ‘pilot’ ba 20 buah sekula di Zon Tengah enggau penatai belanja khas bekaul pelajar STEM dalam Jaku English.

“Projek tu nyengkaum 55 iku pengajar ke dilatih ngena perengka ke diberi tu lalu enti timbal ari tiap sekula tu positif, opis menteri kami deka terus meri sumber ke sama ngagai 60 buah sekula taun tu,” ku iya.

NERANG… Datuk Michael Manyin Jawong rambau dirandau pemberita ba bilik media di Dun, kemari.