PADAWAN: Peranak Kampung Emperoh Git deka ngasai perengkaguna komuniti ti lantang agi pengudah RM200,000 udah dikemendar di baruh Ejensi Penyeraris Pemansang Greater Kuching (GKCDA) dikena nyeruri Balai Mayuhguna Kampung Emperoh Git.
Pekara nya dibantai Sapit Menteri Pengangkut Sarawak (Langit enggau Darat) ti mega Kaban Kunsil Nengeri (ADUN) Mambong, Datuk Dr. Jerip Susil lebuh bejadi Gerempung Pekebun Kupi Padawan (PERKOP) sereta Ngelanchar Mini Coffee Collection Centre di Kampung Emperoh Git, kena Hari Enam.
Ku Jerip, agih belanja nya sebagi ari inisiatif perintah nengah GKCDA dikena nyungkak pemansang infrastruktur pemun ba kandang menua pesisir kelebih agi nengah DUN Mambong.
“Balai tu beguna endar nyadi palan aktiviti komuniti, palan begempuru sereta endur ngatur mayuh program komuniti enggau pemansang sosioekonomi peranak lokal,” ku iya.
Iya mega nyemetak madah ke inisiatif baka tu nipak juluk Perintah Sarawak ngubah tikas idup rayat menua pesisir nengah pemansang sebela enggau meruan.
Jerip ngarap pengawa nyeruri balai ulih dipejalai lengkas ngambi semua komuniti bulih pemaik.
Sama datai, Pegawai Pengatur Pengawa Opis Pelilih Mit Padawan, Julius Scott Sapong, Pemancha Raymond Jihap, Tuai Raban Bansa Kampung Emperoh Git, Robert Asan, bala Tuai Raban Bansa enggau Tuai Komuniti (KMKK) Pelilih Mit Padawan sereta Kaban Kaunsil Mengeri Padawan (MPP). — EDISI UKAS
