RM3K untung sebulan Jangan bejual ensabi

SARATOK: Nadai ngadang diri gerah ngulihka belanja manggai beribu ringgit sebulan nengah pengawa betanam, ku Jangan Achang, 61 taun.

Peranak Rumah Beliang, Sungai Raba di Budu Saratok madah, iya enggau bini iya, Enduyan Lindong, 60 taun, terubah suba semina nanam ensabi pengudah lepa ari pengawa ngintu lada enggau sawit, nyadi engkayu diri sebilik.

“Kami duai teulihka runding manah agi nanam ensabi ari ke masau jam nadai pengawa dikereja pengudah tembu ngintu lada enggau sawit.

“Tambah mega pengawa betanam ensabi tu rumpas dikereja lalu nadai entu mayuh kelikuh kelimpah bisi peminta ari sida ke diau ditu, tebal agi sida ti bedagangka kasam ensabi enggau ensabi idup di tamu.

“Kami duai semina nyual daun ensabi idup aja, lalu dijual ari rumah ke rumah, napatka genturung pendiau sereta rumah panjai ngelingi menua tu empu,” ku Jangan ngelansa pengawa seduai melaki bini.

SEPENEMU… Jangan enggau Enduyan bela rindu ngereja pengawa di tanah.

Ku iya, seduai ngepunka pengawa nanam ensabi dalam bulan Oktober 2015, kira bisi empat taun lebih udah bekebun di Sungai Beruang Kau, enda jauh ari rumah seduai, urung 8 kilometer.

“Kebun tu sedang iya pemesai, kira bisi 30 meter pemanjai enggau buka 20 meter pemesai lalu tanah tu ami endur besayur. Ensabi tu tau dichabut tauka chukup besai ungkup dijual pengudah manggai tiga minggu.

“Maya ngesum baka sayur bukai mega, semina maya nabur leka ensabi begunaka penyikar laban enti kelalu pisit, ensabi enda entu ka nyadi lalu belaian iya mega alus sereta tasal.

“Pia mega enti kelalu jarang, nadai mayuh mega asil ensabi ke tumbuh. Semua meseti ka serap ngambika ensabi ulih tumbuh galak lalu daun mega manah, laban tanah di kebun tu bejumbu,” ku Jangan ngelansa silik.

Nikalka kenang dulu suba ku Janang, seduai semina nanam kedempa diri empu lalu dijual sebelah rumah panjai enti bisi lebih.

PUH… Enduyan benung kiruh nyabut ensabi ke udah chukup besai ngambika bisi dijual.

Tang berindik ari pemanah timbal enggau peminta sida serumah enggau orang ke diau besemak, ngasuh seduai ransing nanam mayuh agi, nangkir kebun besai agi, ku iya.

“Dalam sebulan asil ari ensabi ti dijual lebih kurang RM3000 lalu tu bepanggai ba gaya hari ti nentuka ensabi ulih tumbuh galak tauka enda. Ensabi ditanam berenggat, kira betakah hari ngambika bekal ensabi semampai bisi dijual.

“Berasai lempung endar belanja kami sebilik pengudah nanam ensabi tu nyadika belanja tambah kelimpah ari ngandalka asil sawit enggau lada laban rega makit komoditi nya diatu baruh amat sereta enda tentu,” ku iya mantaika pengelantang diri.

Sepenemu enggau laki iya, Enduyan madahka diri endang rindu ngereja pengawa ba tanah laban iya nemu besai berekat orang ti bejasa ngagai tanah, asil endang ditemu bisi.

“Kitai ke diau di rumah panjai endang ngemeranka pengawa di tanah, bumai betaun, bekebun buah enggau sayur. Rindau meda utai tanam kitai nyadi enggau galak, nyau bebesai belaian daun ensabi,” ku Enduyan.

MANAH… Gaya belaian daun ensabi ti ditanam seduai nerima peminta tinggi.

Seduai melaki bini bela ngarapka utai tanam deka nyadi lalu asil ensabi dijual majak nambah sereta seruran bisi peminta laban tu sebagi ari pemakai asal kitai di rumah panjai.

Tambah mega ku iya, ensabi tu nyamai dibela baka ditasak pia aja, diresih enggau pusu, daun ensabi idup diperuk enggau chabi, bawang enggau garam sereta nyamai direbus gulai enggau salai ikan.

“Enti maya nugal tauka ngetau, ensabi tu nyamai amat kelauk, nadai mayuh utai ngulai, ditambah asi baru kitai,” ku Enduyan madah penyamai ensabi kelauk.

NGINTU… Enduyan benung ngesum ensabi ngambika tumbuh galak.

 

GALAK… Tanah ami manah endur nanam ensabi

Suara Sarawak