RM4 juta geran MPKK ungkup S’wak

KUALA LUMPUR: Opis Menteri Pemansang Menua Pesisir (KPLB) udah ngagihka geran abis mayuh RM10,000 ngagai genap Kaunsil Pengatur Pengawa Komuniti Genturung Pendiau (MPKK).

Saut betulis ari Menteri Pemansang Menua Pesisir Datuk Seri Rina Mohd Harun pasal tanya Kaban Parlimen Ali Biju rambau Aum Parlimen kemari madahka genap MPKK deka diberi geran bepelasarka peminta enggau leman sereta atur ti udah ditetap.

Geran tu nerima peminta ari semua MPKK serata menua lalu ba Sarawak, sepenyampau RM4 juta udah diagih ungkup Renggat Satu.

Agih belanja tu mega udah diberi ngagai Perintah Sarawak dalam bulan Januari 2019 nyin tadi.

Tang naka diatu Perintah Sarawak agi ngemeranka nama Komiti Pemansang enggau Pengelikun Genturung Pendiau (JKKK) lalu ukai MPKK.

Ali Biju

Bepelasarka leman enggau atur peminta ti udah ditetap dalam Atur Ngatur Geran MPKK ke alai MPKK tu enda tau enda udah ditumbuh lalu pekara ti nyadi di Sarawak, JKKK patut ngena nama MPKK sereta bisi akaun bank atas nama MPKK.

Nya kebuah JKKK di Sarawak enda tetangkupka leman peminta tu ngujungka Geran MPKK apin ulih dipejalai.

Taja pia KPLB tetap ngagihka elawin ngagai chairman penyampau RM500 sebulan.

Kesemua agih belanja ungkup Elawin Sarawak ungkup Renggat Satu, iya nya Januari ngagai June 2019 manggai RM15,504,000 lalu agih belanja tu udah diberi ngagai Perintah Sarawak.

Ba tanya lumur 44 kemari, Ali minta Menteri Pemansang Menua Pesisir madah sekalika piak KPLB bisi perambu ngena chara tauka alternatif bukai dikena ngagihka belanja ngagai rumah panjai enggau genturung pendiau berindik ari Perintah Sarawak enda ngaku MPKK.

Alternatif tu beguna amat ku Ali nentuka serap genturung pendiau enggau peranak rumah panjai bela ampit ngasaika buah pemansang dibai perintah besai.

Suara Sarawak