KUCHING: Sepenyampau RM50,000 udah diagih Kaban Kunsil Nengeri (ADUN) Satok, Datuk Ibrahim Baki ngagai Sekula Primari Bansa China (SJK) Chung Hua No 4 dikena nyeleti kelas pintar sida ti rusak ketegal biau balai.
Kena 15 Oktober taun nyin kemari, bisi 17 ari 36 kelas pintar ba SJK Chung Hua No 4 (begunan A, B enggau C) dipangka biau balai ngujung ke sistem rentayan internet enggau perengka pintar ti bukai rusak.
“Aku ngarap bantu tu ulih meri peransang ngagai bala anak ba sekula tu ngambi ransing agi belajar nyadi orang menyana jemah kelimpah nyungkak ngagai pemansang nengeri tu dudi hari,” ku iya.
Ibrahim mansutka jaku nya rambau nyadung angpau enggau bantu pemakai ngagai nembiak serimbai pengerami Taun Baru China (TBC) ba Balai SJK Chung Hua No 4 ditu, sehari tu.
Berebak enggau nya, Chairman Komiti Pengatur SJK Chung Hua Kuching No 1 nyentuk No 6, Datuk Jonathan Chai madah, ungkus dikena nyeleti perengka ti rusak nya manggai RM150,000.
Ba program nya, bisi 50 nembiak SJK Chung Hua ngelingi nya nerima bantu TBC ti deka diintu enda lama agi.
Iya madah, program diatur SJK Chung Hua ti nerima sukung ari bemacham raban nya sebengkah inisiatif dikena mantu sida ti begunaka bantu.
“Beterima kasih laban kitai ulih begempuru ba program tu ti meri mayuh pemaik. Terima kasih mega ngagai raban bekaul ti udah ngemujur program tu,” ku iya.
Iya madah, pengawa ngintu pengerami nya siti ari chara dikena narak semangat beserakup rayat pupu bansa ditu.






