RM80 juta ungkus nyeleti Jalai Ulu Suai

BINTULU: Lebih 7,000 peranak ari empat genturung pendiau, 14 buah rumah panjai, empat sekula, sebuah klinik enggau tiga kebun sawit ba sepanjai Jalai Ulu Suai di Samalaju deka bulih pemaik asil ari pejalai projek nyeleti jalai nya.

Pengawa nyeleti jalai tu mega deka nyadi peransang besai ba pengawa berimbaka tanah ungkup industri betanam betupi, dagang temuai enggau pemansang bukai ti maju agi kelimpah nyungkak pengulih ekonomi menua tu.

Sapit Kepala Menteri Tan Sri Datuk Amar Dr. James Jemut Masing madahka projek nyeleti jalai sepanjai 19 kilometer (km) beungkus RM80 juta tu deka bekenaka teknologi ‘Cold in-situ Pavement Recycling (CIPR) ari Australia.

Ku iya, pengawa bekenaka teknologi CIPR ba projek tu nyadi projek pemungkal lalu enti sema lanchar, chara tu deka dikena endur bukai.

“Ari teknologi tu, kitai ulih ngelimat belanja penyampau 40 peratus dibanding penyampau ke amat,” ku iya ba aum pemberita pengudah bejadika pengawa nasih tanah projek nyeleti Jalai Ulu Suai, ditu.

Perambu ke bendar projek tu iya nya RM150 juta tang ari pengawa bekenaka teknologi tu, semina RM80 juta dikena, ku iya.

Masing ti mega Menteri Pemansang Infrastruktur enggau Perengka Pengangkut madah, pejalai projek nyeleti Jalai Ulu Suai ungkup nyendiaka infrastruktur meruan agi ti nyambung menua tu ngagai menua bukai di Sarawak sereta nangkup peminta ketegal peneras ekonomi tumbuh dia.

Iya nyemetak madahka Perintah Gempung Parti Sarawak (GPS) di baruh pegai Kepala Menteri Datuk Patinggi Abang Johari Tun Openg naka ulih nyendiaka infrastruktur pulaika pengelantang rayat ba menua tu.

Sama datai Menteri Muda Nembiak enggau Lumba Datuk Snowdan Lawan, Menteri Muda Undang-Undang enggau Adat Bumiputera Datuk John Sikie Tayai, Kaban Parlimen Hulu Rajang Datuk Wilson Ugak Kumbong, Adun Samalaju Majang Renggi, enggau Adun Murum Kennedy Chukpai Ugon.

BEJADI… Masing nyain plak seraya dikemata bala temuai dipebasa bukai kelai bejadika pengawa nasih tanah projek nyeleti Jalai Ulu Suai.

Suara Sarawak