ARTIKEL

AMPUH... Bah ti nyadi ba genturung pendiau Kampung Tambay malam Hari Satu.

Rugi beribu ketegal penusah bah

Facebook
Twitter
LinkedIn
WhatsApp
Telegram

JOM BACA E-PAPER SUARA SARAWAK/ NEW SARAWAK TRIBUNE PERCUMA SEAWAL 2 PAGI SETIAP HARI. KLIK SINI

KOTA SAMARAHAN: Raban tasah bah ba Taman Muara Tuang ditu ukai semina napi pengerugi beribu ringgit berindik ari barang mayuh rusak ketegal penusah bah tang mega seruran asai ke diau ba baruh punggu laban irau ke rumah sida ampuh.

Tambah mega, mayuh peranak dia madahka ai bah ukai semina jampat tama ke dalam rumah tang mega ngamahka rumah laban nyau belutak ngujung ke sida enda ulih tinduk jenak maya ujan bangat.

Siku ari peranak benama Jacklyn, 30-an madah, kenyau ari pun taun tu tadi, tiga kali udah rumah sida ampuh kelebih agi maya musin ujan bangat enggau ai pasang raya.

Ku iya, taja selapat ba tisi sungai enggau parit udah digaga dikena nagang ai lilih ke jalai alun enggau rumah tang sekeda lorong rumah ti nadai selapat suah ampuh.

“Kebuah pia laban parit ba genturung enda ulih ngandang pemayuh ai lalu lilih ke dalam rumah peranak baka ba Lorong 3B7 enggau 3B5 kenyau tiga hari ke udah bah tunggal nyentuk ai tama ke dalam rumah.

“Maya penusah bah tunggal nyengkaum kemari, peranak nyau napi pengerugi ketegal reta tengkira dalam rumah rusak enggau jalai alun enda ulih direnchah entukar,” ku iya.

Siku agi peranak, Zubaidah Ariffin, 40, madah, ujan bangat kenyau berapa hari ti udah ngujungka genturung pendiau ampuh ngenyit nyengkaum maya malam hari.

“Malam ensanus, rumah kami ampuh pukul 3 pagi lalu ai surut pukul 10 pagi.

Taja sebedau tu udah berapa kali kami minta raban bekuasa mutarka penusah tu tang nyentuk diatu enda diputar meruan.

“Kitai ngaku bisi pengawa dipejalai nyengkaum meresi tang perati kitai nya penusah bah tunggal apin diputar semitan nentuka penanggul tu ulih diputar chara meruan,” ku iya nyemetak.

Penusah bah tunggal nya ukai semina diasaika Jacklyn tang mega diasaika peranak ba Taman Univista ke alai sida madahka diri udah napi penusah nya kenyau ari lima taun ke udah.

Ku Fadhli Hanafi, 27, maya ujan bangat ngujung ke sekeda peranak ba genturung nya meseti mindahka entukar ngagai endur ti tinggi agi ketegal parit ke bisi diatu enda ulih ngandang ai ujan ngujung ke penusah bah tunggal nyadi.

“Nyau enda nyamai asai maya ujan bangat lebih 30 minit kenyau ari berapa taun ti udah laban kami nemu, rumah kami tu deka ampuh nadai ngira jam.

“Arapka bisi atur semitan ari raban bekuasa dikena mutar penanggul tu,” ku iya.

Ku peranak Kampung Tambay, Taib, 50, ujan bangat enda ngetu kenyau ari berapa hari ti udah ngujung ke peranak nya ninting taun napi penusah ti sama.

Ku iya, belabuh malam Hari Satu maya ai pasang raya ngujungka mayuh rumah ampuh bah enggau ai niki nyentuk tikas pah.
“Arapka raban bekaul ulih nyadung bantu ngagai raban tasah bah laban udah dua malam kami dituntung penusah bah tunggal ti ngerusak reta tengkira.

Udah tentu mayuh pengerugi ditapi kami,” ku sebana ati iya.

Ujan bangat ti nyadi kenyau ari tiga hari ke udah ngujung ke tikas ai niki ukai semina ditu tang mega ba sitak bukai di Kuching.

Taja pia, naka diatu ai nyau majak surut ba sekeda genturung pendiau.

TEKERUGA… Genturung pendiau ba Taman Muara Tuang ti diampuh bah tunggal kena Hari Minggu tu tadi.
BAH TUNGGAL… Genturung pendiau Taman Univista ti diampuh bah tunggal kena Hari Minggu.

BERITA LAIN

Peranak Bukit Saban nerima pala tanah

SPAOH: Bisi 350 peranak sitak Bukit Saban diatu berasai lantang lebih nerima Surat Pala Tanah Seksyen 18 Kanun Tanah Sarawak. Surat pala tanah nya meri

KMKK meseti pintar ngemansang Spaoh

SPAOH: Bala Tuai Komuniti enggau Tuai Raban Bansa (KMKK) dipinta ngena pemintar runding enggau berani nyerungkai peluang baru ngadu pemansang Spaoh nipak ubah dunya. Sapit

BERITA TERBARU

Ba’Kelalan berpotensi jadi destinasi pelancongan unik

KUCHING: Keunikan budaya, kraftangan dan hasil tempatan menjadikan Ba’Kelalan berpotensi muncul sebagai destinasi pelancongan baharu yang menarik di Sarawak. Menteri Pelancongan, Seni dan Budaya, Datuk