Rumah panjai kelia mayuh penyelai dibanding diatu

KUCHING: Rumah panjai kitai kelia menya dientak ngambi bisi endur ngenduh ari ujan enggau panas lalu ngembuan mayuh penyelai sekalika ari sukut pengelikun enggau gaya pengidup.

Ku Insol Harry, 47 taun, langkar rumah panjai mega bepegai teguh ngagai adat lama bansa asal enggau teguh sereta tan laban digaga ari kayu belian dulu menya muntang diulih ba menua tu.

Perabung

“Perabung suah agi digaga ari daun ti ditusuk nyadi atap baka daun biru, pantu, mulung, apong tauka bansa daun ti tebal. Dinding rumah digaga ari buluh, papan enggau kulit kayu.

“Enti suba, tangga digaga ari kayu segala tauka lumpung kayu ti diukir nitihka pengelandik jari siku-siku nempa ukir, lumpung kayu tebelian dipungga ngena beliung ngambika begigi.

“Laban rumah panjai moden diatu dientak malai tanah nya kebuah jarang amat kitai meda tangga baka tu bisi digaga,” ku Insol, peranak asal Batu Lintang, Undop di Sri Aman.

TEGUH… Gaya pendiau rumah panjai lama Iban.

Bilik besai, ruai enggau tanju

Ngelansa silik agi, rumah panjai bisi tiga bagi iya nya bilik besai, ruai enggau tanju lalu bisi mayuh guna enggau nama dikena kitai ngangauka bagi rumah panjai tu.

Rumah panjai suba dientak tinggi lalu tanju suah agi endur ngereja pengawa begunaka mata panas baka nyembi utai baka gari, padi, lada, getah, koko, bila bemban, senggang enggau ke bukai, ku iya.

“Ruai endur berandau, ngaga duku, endur beranyam, ngebat, endur rami enggau mayuh pengawa bukai. Entara ruai enggau bilik sepiak bisi pedilang endur nyalai antu pala enggau bekindu maya chelap laban sida ke tuai menya nadai tentu bisi baju, gari tauka pua taya dikena ngarung tubuh diri.

Pedilang

LANDIK NGUKIR… Kayu tebelian dipungga nyadika tangga ti diukir manah ngelai pengelandik nembiak redak rumah panjai nya.

“Pedilang endur ngangatka tubuh maya chelap dini hari. Enti temuai niki serta meda antu pala ba pedilang dia sida nemu ruai orang nya ruai bujang berani.

“Lalu maya ngetau tauka ngembuah engkabang ruai kena nugung ka padi ke bedau ditungku tauka kena nugungka engkabang bedau chukup dijembi,” ku peranak penakan Iban China nampung silik.

Nangkan nya, atas ruai dikumbai kitai pemangai, iya nya endur engkah sangkuh, terabai, ilang enggau nyabur enggau bisi sekeda endur mangaika tikai ke manah dianchau nagaka temuai datai.

Tempuan

TEGAP… Tiang tengah dientak nyadika tiang penegap enggau mandangka pengering sida ke lelaki beban kayu ramu dikena berumah.

Entara ruai enggau bilik ku Insol digaga selapat ke dikumbai tempuan ti suah endur bala indu nutuk, ke alai talun tauka lesung ditanchang sepiak pangkat kayu.

Mua pintu kekadang endur engkah manuk sabung. Kebuah manuk sabung engkah ba mua pintu awakka iya suah dipansa lalu jinak nyamai dilatih.

Pintu ditating ngena utai berat baka batu awakka nikup kediri empu nya ke ngasuh mayuh pintu bekeritit bebunyi enti ditukang.

Jeman ngayap

“Jeman orang agi ngayap menya, sida ke lelaki deka belubah nukangka pintu nangika engkinyik ngujungka orang ti tinduk tedani.

NGINTU PENGAWA… Tanju endur sida ke indu nyembi enggau berayarka padi, nyembi lada, enti musim engkabang bebuah, endur ngerangkai engkabang.

“Belebuh mega apai orang indu nganu enti anak iya digayap taja begayap sigi adat sida ke bujang enggau dara kelia,” ku iya seraya nampung, nya ke ngasuh sida ke ngayap ari sadau nangika pintu bemunyi beretit tauka enda ulih ditukang laban dikunchi rapit maya malam hari.

Ba tengah ruai mega bisi tiang siti ke besai, dikumbai tiang tengah, tu endur ngaitka duku, laja, jabung, gagung, sereta endur ngaitka pukat enggau jala. Pengait digaga ari tanduk rusa diberekas begulai enggau tiang tengah ti digaga tegap laban nya nunjukka pemintar orang ke diau ba bilik nya.

Pia mega pintu tama ke bilik digaga manah ari kayu pansap laban nya nandaka pemanah rumah tauka bilik kitai siku-siku.

“Ba mua pintu bisi tempuan dalam bilik endur sida ke indu ngengkah genuk nyimpan ai enggau mandi kelebih agi meri sida ke anembiak agi mit mandi sereta tempuan tu endur bira enggau kemi baka jamban kitai kemaya hari.

Dapur

CHUKUP LANDIK… Sekeda ari ukir dinding ti suah ditengkebang sida ti angkunka pengawa ngukir.

“Sepiak tempuan dikumbai kitai dapur endur berapi, nyalai, mansuh enggau manduk utai lalu ba atas dapur bisi empara endur engkah kayu, salai enggau utai dempa ke bukai, ti mega endur makai, ngirup, tindu sereta endur betenun pengawa sida ke indu.”

Bilik besai dulu suba digaga sedandang, nadai bepangking lalu semua tindu ngaringka diri betusun nitihka kedeka diri sebilik lalu tikai peninduk suah agi digaga ari wi.

“Siti tikai dua tiga iku tinduk dia ti semina dianchau malam hari tang siang hari deka digiling baru lalu sida tu tindu nadai betilam, bepanggal, bekibung enggau bepua.

“Rindu amat meda ba tisi bilik didijirka enggau tajau, tawak, gong, bebendai ngayanka pengaraja diri sebilik lalu tajau mega endur nyimpan berau enggau ai tuak.

Pelabuh

“Ujung bilik tauka punggang enggau tau dikumbai kitai pelabuh mega bisi didiri langkau mit siti endur engkah kerungan ti endur manuk diau, di baruh nya endur nyimpan dulang meri jani makai.
“Sepiak dinding enggau bilik bukai suah mega digaga bilik penyenguk endur ngunsung panggan diri ari bilik enda mansa ruai, kelebih agi sida ke indu,” ku Insol mulaika pengingat diri.

JAGA… Manuk sabung ditambat ba mua pintu bilik ti suah dipansa lalu jinak enggau nyamai dilatih.

 

BEKUNSIKA PENEMU … Insol Harry, peranak asal Batu Lintang, Undop, Sri Aman.