KUCHING: Rang Undang-Undang (RUU) Librari Nengeri Sarawak (Ubah) 2026 dikemendar pengudah nerima sukung semua Kaban Kunsil Nengeri (ADUN) ba Aum DUN Sarawak ditu, tadi.
Menteri Pelajar, Inovasyen enggau Pemansang Penau, Datuk Sri Roland Sagah Wee Inn madahka pengawa ngatur rikod enggau arkib ba semua opis mensia mayuh di Sarawak deka dipejalaika enggau terang, konsisten sereta nitihka atur ti udah ditetapka.
“Inisiatif perintah nengeri ba pekara tu bepelasarka langkar undang-undang enggau atur sereta standard nasional dikena nentuka pengawa ngatur rikod dipejalaika enggau meruan.
“Begunan Arkib Nengeri Sarawak ti baru ba Petra Jaya, ti bepalan ba sepiak Pustaka Nengeri Sarawak ditagaka tembu dalam bulan November 2026 lalu ulih disediaka ngagai mensia mayuh.
“Palan ti ngembuan pemesai 25,476 meter persegi nya diperambu nyadi palan endur nyimpan rikod perintah nengeri sereta kereban sejarah Sarawak ti likun ngambika ulih dijaga enggau manah,” ku iya.
Sagah bejaku munyi nya rambau bacha ketiga RUU Librari Nengeri Sarawak (Ubah) 2026 ti udah dikemendarka ba Aum Kedua Penggal Kelima Kunsil Nengeri (DUN) Sarawak ba Kompleks DUN, ditu, tadi.
Ku iya, begunan nya mega disikap enggau palan Sistem Nyimpan enggau Ngambi Automatik (ASRS) ti ngembuan pemesai 10,000 meter persegi ti digaga dikena ngangkatka pengelikun endur nyimpan sereta ngurangka timpuh ngambi dokumen ngagai urung dua ngagai tiga minit aja.
