KUALA LUMPUR: Rang Undang-Undang dibantaika Perintai Besai sempama baka bup ti manah kulit tang nadai isi.

Kaban Parlimen Batang Lupar Datuk Seri Rohani Abdul Karim, Kaban Parlimen Gabungan Parti Sarawak (GPS) deka pekara tu patut dikemanahka agi.

“Aku enggau Kaban Parlimen GPS ke bukai bepenemu pekara tu patut dikemanahka agi, ukai semina madah Sabah enggau Sarawak nya bakih kunsi dalam Malaysia.”

“Mayuh pekara bekaul enggau Sempekat Malaysia 1963 (MA63) patut diberi perati lalu kitai enda tau nyukung penuh laban nangi ulih ngurangka hak nyadi bakih kunsi ti bedau dipadah enggau penerang ti engkeman,” ku iya nerang ngagai media, kemari.

Kemari keterubah iya dalam sejarah siti Ubah RUU Konstitusyen Perintah Besai udah ditulak.

DATUK SERI ROHANI KARIM

Rohani nambah, puntan bulih 2/3 undi ari kaban parlimen aum parlimen senentang RUU Ubah Konstitusyen Perintah Besai nya patut nyadi lalau Perintah Besai baruh Pakatan Harapan.

“Tu nunjukka rayat Sarawak deka pekara tu digaga penuh lalu enda berumban.

“Kami enggai hak anak Sarawak dipenyati dudi ari enti ngamatka ubah RUU ti nadai nerang enggau silik senentang meri pemaik ngagai Sarawak,” ku iya.

Kenu ku iya, leka jaku ‘Bepelasarka Sempekat Malaysia 1963’ patut dimasuk ngena penerang ti silik ngambi Sarawak enda lenyau hak nglamatu ulih diberi pulai baru.

GPS udah mantaika penemu ngambika ubah tu dibai ngagai renggat Komiti Dipilih Khas tang enda dikibuhka kellimpah dituduh ngeruga hak Sarawak lalu semua tu enda amat.

Ba pengawa tu, iya deka semua rayat Sarawak, kaban parlimen GPS enda nulak ubah tu. Semina enda ngundi tauka ngambi sebengkah chara enda ngambi bagi ngujungnadai bulih 2/3 majoriti.

GPS ngambi atur tu ngambi nagang pengawa enda adil ngagai hak Sarawak nitihka Sempekat Malaysia 1963.

Suba ubah RUU dibantaika seriris enggau MA63 ti dipadu ba taun 1963 kelimpah meri peransang perintah nengeri Sarawak enggau Sabah sereta rayat ba kedua nengeri nya.

Suara Sarawak