Saberkas Engkilili udah milih pengari Kasus

ENGKILILI: Saberkas Pampang Engkilili mujur ngiga pengari ba main futsal enggau badminton ti deka ngarika pelilih menua tu ba Pekit Lumba Saberkas (Kasus) 2019 Renggat Nengeri di Sibu.

Nitihku Chairman iya, Dr Johnical Rayong Ngipa komiti tu bisi ngatur ngatur Pekit Futsal enggau Badminton bepalan ba Balai Raya Dr Johnical Rayong Ngipa, Skrang ditu kena 20 ngagai 21 Julai tu tadi.

“Tuju program ke diatur pengelama dua hari tu tadi endang dikena ngiga raban nembiak ke landik ba main futsal enggau badminton ngarika menua Engkilili ba renggat ke lebih tinggi.

“Pia mega, program tu pengawa manah ungkup raban nembiak laban ulih nyeliah sida ari ngereja pengawa ke enda menuku sereta ngerapitka kaul entara kaban Saberkas Pampang Engkilili,” ku iya madah ngagai Suara Sarawak.

Iya madah rambau bejadika Pekit Futsal ba Gelanggang Futsal Skim Skrang ditu, apin lama ke udah.

SERURAN NYUKUNG…Chairman Saberkas Engkilili, Dr Johnical Rayong betabi enggau bala pemain futsal pengudah bejadi pekit nya.

Berebak enggau nya ketuai komiti pengatur program tu, Awang Said bin Awang Dollah meri terima kasih ngagai semua komiti program laban ke udah nunjukka kerejasama sereta sukung sepanjai pekit Kasus tu.

“Ngarapka bala pemain ke udah dipilih ngarika Saberkas Pampang Engkilili nguna pelasar lumba tu dikena nempa kaul enggau penyereta ari pelilih menua bukai.

“Kelimpah bekelala enggau ketuai tinggi Saberkeas ba renggat nengeri,”ku iya.

Ngelansa pasal Pekit Futsal enggau Badminton Kasus Renggat Engkilili apin lama ke udah, bisi tujuh bengkah tim ngambi bagi ba main futsal lalu badminton lapan.

Champion pekit futsal iya nya tim E-Galaxy, Remjel (lumur dua) enggau BJ CFC (lumur tiga).

Udah nya ba pekit badminton champion tim AA, Elite Force (lumur dua) enggau BSS BC (lumur tiga).

BULIH PERAIS…Komiti pengatur program, Tuai Rumah Fendy Gerang nyuaka perais ngagai siku pemenang pekit Kasus 2019 Renggat Engkilili, apin lama ke udah.

 

TIM FUTSAL…Entara tim futsal ke bisi ngambi bagi ba pekit nya.