KUCHING: Lima menteri enggau sapit menteri Dayak angkat sumpah megai tanggungpengawa sida dalam Kabinet Malaysia ba mua Seri Paduka Baginda Yang di-Pertuan Agong Al-Sultan Abdullah Ri’ayatuddin Al-Mustafa Billah Shah, kemari.
Ba tusun kabinet Perintah Besai sebedau tu, semina siku aja pengari rayat Dayak angkat sumpah nyadi menteri penuh, iya nya Baru Bian – Menteri Kereja Raya.
Nya alai, tusun kabinet baru tu mandangka Perintah Besai ngemeratka pangku pengawa nya sereta sada nyawa bansa Dayak ba Parlimen.
Kaban Parlimen Kapit Datuk Alexander Nanta Linggi ngepunka rintai keterubah entara lima pengari rayat Dayak angkat sumpah nyadi Menteri Dagang Dalam Menua enggau Pekara Pengguna ba kabinet baru di baruh Menteri Besai Tan Sri Muhyiddin Yassin.
Nangkan nya, Kaban Parlimen Saratok Ali Biju keterubah dilempai pengandal ba Kabinet Malaysia angkat sumpah megai tanggungpengawa nyadi Sapit Menteri Pengeluar Kuasa enggau Pengeraja Asal.
Pia mega Kaban Parlimen Puncak Borneo Willie Mongin dipadu nyadi Sapit Menteri II Pengawa Ladang enggau Komoditi mujur angkat sumpah megai tanggungpengawa keterubah ba kabinet.
Kelimpah ari Wiliie enggau Ali, Kaban Parlimen Lawas Datuk Henry Sum Agong mega keterubah angkat sumpah nyadi Sapit Menteri Pemansang Menua Pesisir II.
Berebak enggau nya, Kaban Parlimen Kanowit Datuk Aaron Ago Dagang kemari ngangkat sumpah megai pangku pengawa Sapit Menteri Pengerai II lalu keterubah ba Kabinet Malaysia.
