KUCHING: Tuai Indu Parti Rakyat Sarawak (PRS), Datuk Seri Doris Sophia Brodie ningkah penemu pakar undang-undang konstitusyen, Dr Abdul Aziz Bari ti ngasuh Menteri Kereja Raya, Datuk Seri Alexander Nanta Linggi nyurut kediri berindik ari penerang iya ba siti randau radio empai lama.
Doris ba sebengkah penerang media nyemetak madah, pengawa ngetan Sempekat Malaysia 1963 (MA63) enda patut dikumbai enda taluk ngagai Perintah Besai.
Ku iya, penemu nya ukai semina lari ari isu ti amat tang nyeremin pengirau besai politik lebuh malin ngagai MA63 dikumbai enda patut diaku ba pelasar nasional.
“Penemu ti ngemerat prinsip tanggungpengawa begulai Raban Menteri engka ulih ditan ari sukut teknikal tang enda engkeman ari sukut konstitusyen enti dikena nagang menteri mantai pengamat konstitusyen enggau identiti politik nengeri ti numbuhka Malaysia.
“Penemu ti dibantai Nanta ukai penemu ti besibil enggau pemutus Kabinet lalu ukai mai nengeri tu ningkilka diri ari Malaysia tang nya datai ari pengelebu politik ti beurat ari status Sarawak nyadi bakih kunsi numbuh Malaysia.
“MA63 ukai siti pilih tang nya undang-undang ti nempa Malaysia.
Malaysia ditumbuh laban Sarawak enggau Sabah setuju begulai enggau Malaya numbuh menua tu tang bepelasarka atur ti dipesetuju begulai,” terang iya.
Doris meri gerah pengawa mejal Nanta nyurut kediri ketegal iya ngetan MA63 ulih nyadi chuan pengawa ngeruga pengelantang menua laban nya ngelai bala tuai ari Malaysia Timur semina ulih bemalinka MA63 nitih ke tatak ari sekeda raban tang pengawa ngetan sempekat nya enda begunaka pemendar ari sapa-sapa.
Iya madah, bida entara sukut undang-undang enggau sukut legitimasyen patut dipereti ba sukut kaul Perintah Besai enggau nengeri lalu penyerakup ukai dijaga nengah ‘pengawa diau diri ketegal dipejal’ tang bebasa ke pekara ti udah dipesetuju ba pengawa numbuh menua.
Tampung iya, nyema pengawa nandu prinsip MA63 dikumbai ngeruga pengelantang menua, kebendar isu ti amat ukai ba penerang ti digaga tang ba pengasai enda nyamai institusyen ngagai pugu sempekat numbuh menua tu. – SF
