KUCHING: Opis Servis Veterinar Sarawak (DVS) chakah ngatur mayuh program dikena nyapai juluk ati perintah nengeri enggau dunya iya nya nadai pemati ketegal rabies ba taun 2030 (Zero Rabies Deaths 2030).
Direktor DVS Dr Adrian Susin Ambud madahka nya alai rambai jaku nyerumba Hari Rabies Sedunya 2021 taun tu disebut ‘Rabies: Fact, Not Fear’ siti rambai jaku ti patut ditesau ngagai mensia mayuh.
“Penerang ti betul patut disadung baka penyedar sentang penyakit, nyeliahka kes rabies, nentuka bala jelu divaksin enggau pelajar ngagai mensia mayuh chara nyeliahka rabies.
“Aram kitai sama bekunsi penerang enggau penemu pasal rabies laban 99 peratus pekara nya ulih nagang pengerekai rabies,” ku iya.
Adrian bejaku munyi nya ba Program Hari Rabies Sedunya 2021 ti dipanchar terus nengah Facebook Ukas, kemari.
Kelimpah ari nya, ku iya penakut (fear) ulih mai reti peneleba orang ti takut ketegal rabies.
“Sida engka takut laban kala ditagum jelu sereta takut diau enggau komuniti ti ngembuan kes rabies ngerekai.
“Takut tu mega ulih dikaul enggau asai takut ti nyadi kelai orang lebuh kena rampit rabies.
“Nangkan nya, takut mega ulih dikaitka ngagai penanggi kitai ngagai berita bula ti ayan pasal rabies ngujungka mensia mayuh enggai nuchuk vaksin ngagai jelu tupi sida,” ku iya.
Iya madahka, kerejasma nyadi jalai pemujur ngagai juluk ati perintah nya ngambika semua orang ngambi bagi mantu nyeliahka kes rabies.
“Siti chara kitai ulih munaska rabies nya nya bekerejasama enggau beserakup nuju juluk ati nadai kes rabies manggai 2030.
“Aku beterima kasih ngagai tuai kami, Chairman Komiti Penyangga Penusah Nengeri (JPBN) Datuk Amar Douglas Uggah Embas laban udah bebendar mantu mutarka penanggul rabies di menua tu,” ku iya.
