LUNDU: Sampadi deka dikemansang nengah perambu manah ba timpuh lima taun da dikena ngubah kandang endur nya nyadi siti mengeri pintar ti disikap perengkaguna moden ngambi nyadi hab pemansang baru ba Tanjong Datu.
Premier Sarawak, Datuk Patinggi Tan Sri Abang Johari Tun Openg madah, perambu nya deka beratika palan Sampadi ti strategik sereta besemak enggau kampus baru Universiti i-CATS ditumbuh.
“Pemansang Sampadi mega deka disukung nengah atur penyambung ti manah agi, kelebih agi nengah penembu Jematan Rambungan.
“Aku nyukung peminta Azizul minta pemansang di Sampadi.
“Ba timpuh lima taun ti deka datai, kami deka dulu ngadu perambu ngambi palan tu narit ati sereta nyadi palan ungkup program baru enggau perengkaguna moden.
“Palan nya deka nyadi mengeri pintar ngena perengkaguna ti pemadu baru, nyengkaum IT,” ku iya.
Abang Johari bejaku munyi nya rambau program nutup Regata Lundu Sungai Batang Kayan ditu, kemari.
Ku iya, universiti nya ulih nyadi tiang pemansang ba kandang menua ngelingi nengah chara nyendia akses ngagai penemu enggau pengelandik, nyengkaum bidang singka miga enggau bidang baru ke bukai.
Iya mega madahka pemesai guna ngemanahka agi perengkaguna ba Tanjong Datu, laban ngembuan dua jalai besai iya nya nengah Jalai Besai Pan Borneo enggau Jalai Matang.
Ku iya, tu deka ngenegapka agi jalai penyambung ngagai Tanjong Datu sereta nyagu kandang endur tu nyadi pintu penama ti beguna.
Ngenang Jematan Rambungan, Abang Johari madahka Perintah Sarawak udah ngambi projek nya lalu udah nyiri kunteriktor baru ari menua tu empu nentuka jematan nya tembu.
“Kitai udah ngambi Jematan Rambungan, ti lalu enda nemu tembu.
“Insya Allah, kunteriktor baru udah dipadu lalu kitai udah meri sida sekeda agih belanja tambah ngambi Jematan Rambungan ulih tembu ba taun 2027,” ku iya.
