Sanggup datai ngena bilun engkabang meli empurau

KAPIT: Empurau ikan sungai ke pemadu berega ba menua kitai lebih agi di Sarawak.

Kenu ku Jim Tukaw tauka Ari ari Nanga Antawau ditu madah, suba siku anak tauke ari Sibu sanggup meli enggau rega RM20, 000.

“Iya mega sanggup datai ngena bilun engkabang ngagai rumah aku ba Nanga Antawau ditu.

“Tusah digiga, nya alai ikan tu chukup berega. Kekadang rega iya ulih mangai beribu ringgit nitihka pemesai tauka pemerat,” ku iya seraya madah isi ikan tu manis sereta ngelai pemisi orang ke meli iya.

Empurau tu ikan ke lubah betelu sereta meseti dijaga sepengelama dua ngagai tiga taun enti ditupi ba pegung sebedau ulih djiual enggau rega ke tinggi.

IKAN BEREGA…Anak indu iya, Arniza mantaika Empurau ti ulih pukat apai iya apin lama ke udah.

Ari madah diri endang manah nasip lebuh mukat ba ai Batang Balleh endang semampai bulih ikan empurau tu.

Lebuh dirandau pemberita Ruai, Suara Sarawak, dia iya madah ikan tu rindu idup ba ai ke enda beriak sereta lubuk sungai.

Iya mega madahka ikan tu rindu makai buah engkabang, buah kelampai, buah ensurai sereta buah ke labuh ba mua ai sungai ke tau ngasuh ikan tu gemuk enggau belemak.

Kelimpah ari nya, iya mega kala nguji nupi ikan tu lalu mayuh pemar udah ditapi sekumbang ke nyaga pegung tu.

Maya nupi ikan tu dipegung, pemedis ati kala diasai lebuh jelu baka seranai (bandau) enggau ringin ai Balleh makai ikan sereta anak ikan kelimpah kena empa burung bangau.

RINDU BERIKAN…Pengawa berikan endang pemadu dikerinduka Ari kelimpah ari ngasu.

Ikan ke ditupi mega kala parai ketegal ai ti keruh laban iya bekena ke mata ai sungai laban tanah ke disungkur tusur sida piak kem batang.

“Aku semina nupi ikan empurau tu ari ikan ke agi idup ulih mukat lalu diidup ke aku ba pegung enggau enda nupi ikan tu ari anak ikan ti dibeli.

“Lebuh ke ngaga pegung ikan tu, nadai mayuh leman laban ai iya enda ibuh diperesi semina nguna ai ari sungai aja,”ku iya.

Ku iya, rega ikan empurau tu ulih manggai RM700 ngagai RM800 sekilo tang diatu rega ikan tu nurun ngagai RM500 sekilo.

Empurau burak lebih berega agi enti dibanding enggau empurau mirah.

“Aku bisi nyual ikan tu ke luar Kapit tauka dieksport ke Sibu tauka Kuching dibeli bala tauke restauran enggau bisi dijual ba Makit Teresang,”ku iya.

Beduduk ari nya, Jim Tukaw tu siku orang endang beridup enggau pengawa berikan sereta ngasu jelu ba kampung.

Asil ari pengawa nya, nya mih nyadika penatai pemisi dikena ngidupka anak enggau bini ba rumah panjai.

Iya madahka pengawa berikan tu chukup dikerindu ke iya kenyau ari taun 1985 sepengelama 34 lebih taun taja kala ngasai ke penakut lebuh karam ba sungai Balleh tang enda ngelenyau ke minat iya sekali sereta ngembuan penemu ke mayuh ba pengawa berikan enggau ngasu ba kampung.

ENDA LEBU MUKAT…Jim enggau bini iya sama temegah ati megai dua iku empurau ke deka dijual ngagai siku tauke besai.

Suara Sarawak