Pantang mandangka identiti bansa, kelia iya digaga endang bisi tuju enggau reti

KUCHING: Seni pantang asal Iban ulih lenyau nyema nembiak rebak baru diatu enda mereti guna pantang asal sereta ngetan ke adat tu jemah.

Pantang Iban tu mandangka identiti bansa lalu iya digaga endang bisi tuju enggau reti.

Nitih ke penerang siku nembiak pelajar tinggi Master Universiti Malaysia Sarawak (Unimas) ari Fakulti Seni Gunaan enggau Kreatif, John Bosco Han Anderson Medan, bansa Iban ba Sarawak urung 400,000 iku tauka 30 peratus ari bansa bukai di menua tu.

Ku iya, bansa Iban suba dikelala ketegal pemerani ba pengawa ‘ngayau’ (mumpung pala munsuh) tang diatu bansa Iban dikelala siti bansa ti manah sereta siru.

“Nembiak rebak baru diatu endang agi ngetan ke adat asal enggau pesaka Iban tang empas pemansang dunya adat asal enggau pesaka tu lalu anyut dibai pemansang.

“Baka pengawa ngambuh Ilang enggau Nyabor (duku panjai dikena ngayau kelia), nganyam tikai bemban, betenun pua kumbu, ngajat enggau pantang,” ku iya lebuh ngaga licha pasal ‘Ngintu Pantang Asal Iban Ngagai Generasyen Baru’ beserimbai enggau Program Talk Heritage ba Opis Muzium Sarawak kena 17 Mei tu tadi.

Ku John, taja bisi nembiak rebak baru ngembuan ke pengawa bepantang kediatu tang sida kelebih agi rindu ngelangkar pantang nitih ke motif bukai baka motif Maori ari Jipun enggau pantang kontemporari nitih bansa ribai.

Pia mega iya nambah ka, pantang Iban tu sebengkah pengawa ngelangkar ukir ba tubuh ngena dakwat, nyura enggau pigmen ngena minyak, bateri karbon, dakwat tali sipat tauka dakwat India.

“Kelia pantang tu lalu dipuchau tauka diunsut pengaruh ngambika ulih magar tubuh orang nya ari munsuh tauka penusah sereta penyakit.

“Mayuh macham motif pantang asal Iban mai reti bebida nyadi kelaie etnik enggau adat asal baka Bungai Terung,” ku iya.

Kelimpah nya, iya madah ka pantang Iban tu bisi empat bengkah kategori baka bungai, utai tumbuh, jelu enggau utai bukai baka bilun, sangkuh enggau perengka nginti.

Nangkan ke nya, John madah ka ketegal mimit penemu sentang pantang asal Iban sereta guna pantang tu nyadi kebuah nembiak diatu enda tentu gagit ngetan ke pantang asal.

“Nya alai, aku ngarapka nembiak rebak baru nemu reti pantang asal Iban enggau guna ngetan ka pesaka tu dudi ari ila ngagai bansa Iban.

“Anak lelaki Iban diatu mayuh enda mereti pantang enti sida nadai nemu reti langkar enggau nama kebuah kitai kelia bepantang nyadi pekara tu patut diperatika sida,” ku iya.