Sapa dipansik SPRM?

KUCHING: Sapa orang bepangkat besai di Sarawak ke benung dipansik Komiti Nagang Pengawa Makai Suap Malaysia (SPRM)?

Pekara nya benung nyadi tanda tanya lalu Ketuai Opis SPRM Latheefa Koya ngamatka jaku bisi kes diterima bekaul enggau ‘yu besai’ (kes orang pangkat besai) di Sarawak.

Iya madah, piak sida benung mansik dakwa nya enggau iya enda ulih madah penyampau kes laban pekara nya agi dalam pansik.

“Kes nya deka nyadi lumur ti ‘fleksibel’ enggau ulih berubah,” ku iya lebuh ditanya pemberita sentang penyampau kes di Sarawak.

Nitihka Latheefa, kes ti agi dalam pansik enda ulih dipadah laban irauka meri empas ngagai pansik ti benung dipejalaika.

“Bisi mayuh kes enggau kompelin digaga mensia mayuh lalu kita tau madah ngagai aku nama-nama kes awakka pansik ulih digaga.

“Tiap kes ti bekaul enggau orang bepangkat besai (VIP) tauka sapa aja ti benung dipansik enda ulih dipadah laban bisi kebuah,” ku iya.

Iya bejaku lebuh ditanya pemberita maya ‘Pementasan Teater Muzikal Semarak Pertiwiku’ ti digulu Kepala Menteri Datuk Patinggi Abang Johari Tun Openg di Auditorium Tun Ahmad Zaidi Adruce Palan Matih Pengajar Kampus Batu Lintang ditu, ensanus.

Tandu iya, tiap pansik ti dipejalai bisi timpuh.

“Kitai enda nemu berapa lama pansik dipejalaika laban bepanggai ngagai bansa kompelin ti digaga.

“Udah abis pansik enti bisi dawa, kitai deka madah lalu kita semua deka bulih penerang enggau penuh,” ku iya.

Ku iya, enda semua kompelin deka ditembuka enggau pansik laban bisi penerang ti enda nyemetak.

“Kitai deka muka keretas pansik tumu laban deka nentuka penerang ti diberi.

“Kekadang bisi orang meri mayuh macham dokumen tang kitai enda nemu baikka nya semina diambi ari internet tauka utai bukai,” ku iya.

Iya nerangka, udah ngesahka dakwa baru sida deka muka keretas pansik.

“Pekara nya digaga enggau mayuh chara lalu aku enda ulih meri penerang ti dalam agi.

“Tang aku ngamatka meseti bisi kes bekaul enggau orang bepangkat besai sereta ti bukai, semina ngambi awak dipejalaika,” ku iya.

Sebedau tu, Opis SPRM Sarawak ngesahka nerima kompelin sentang penyalah makai suap digaga ‘jerung besai’.

Direktor SPRM Sarawak Razim Mohd Noor madah bisi lebih ari siti kompelin ari mensia mayuh ngagai penyalah makai suap ‘jerung besai’ nya.

“Enti kitai nerima kompelin ari mensia mayuh, Indu Opis SPRM deka meri gerah ngaga pansik.

“Teleba agi, pansik ngagai kes ‘berprofail tinggi’ deka dipejalaika bala pemesai ari Indu Opis SPRM empu,” ku iya.